Jabuura 69 - Fulfulde Bible

Tornde toskaaɗo e toonyaaɗo

¹ Ngam kaliifaajo gime fodde daande “gurguli”. Yimre Daawuda.

² Hisnam, yaa Allah, ngam ndiyam yottake daande am!

³ Mi ɗon nufo nder loope haa mi waawataa daraago, mi ɗon nder ndiyam lugguɗam, ɗam ɗon ilnammi!

⁴ Mi somi wookugo, kondondol am ɗon yoora, wula jaw, mi ɗon reene haa gite am comi.

⁵ Wanyɓe yam bilaa daliila ɓuri gaasa hoore am ɗuuɗugo. Konne'en am, yiɗɓe halkugo yam bilaa daliila ɗon bee baawɗe, ɓe ɗon ndoolammi hokkititgo ko mi hoo'aay.

⁶ Yaa Allah, a anndi humakaare am, aybeeji am cuuɗanaaki ma.

⁷ Taa accu hoolotooɓe ma cemta ngam daliila am, yaa Jawmiraawo honooɓe asama! Taa accu hooliiɓe ma tosko ngam daliila am, yaa Allah Isra'iila!

⁸ Ngam daliila maaɗa, yimɓe kuɗi yam, mi toskaaɗo.

⁹ Mi laatani deerɗiraaɓe am jananno, ɓiɓɓe daada am ɗon ndaarammi bana ɓe anndaa yam.

¹⁰ Ngam yiide nde marmi ngam suudu ma ɗon wula nder am bana yiite, kuudi huɗooɓe ma yani dow am.

¹¹ Mi suumi, mi woyi, ammaa ɗum fooɗani yam kuudi.

¹² Mi ɓorni limce buhuuje, kamɓe boo ɓe njanci yam.

¹³ Jooɗiiɓe haa dammugal berniwol ɗon nyo'ammi, wuykooɓe ɗon mbaɗa gimi dow am.

¹⁴ Ammaa min mi toroto ma, yaa Jawmiraawo! Ɗum saa'iire waŋgingo mo'ere ma! Yaa Allah, jaabam fodde ɗuuɗeeŋga mbooɗeeŋga ma, hisnam fodde gooŋgaaku ma.

¹⁵ Wurtinam loope, taa mi nufa, hisnam juuɗe konne'en am, wurtinam nder ndiyam lugguɗam.

¹⁶ Taa accu ndiyamji ilnammi, taa accu ndiyam lugguɗam moɗammi, taa ngaska halkere maɓɓa hunnduko mum dow am.

¹⁷ Yaa Jawmiraawo jaɓ tornde am ngam mbooɗeeŋga ma seynatam, fodde enɗam ma ɗuuɗɗam, waylita haa am.

¹⁸ Taa wiirnu maccuɗo ma gite ma, mi ɓilliiɗo, jaabam law.

¹⁹ Ɓaditam, hisnam, rimɗinam e juuɗe wanywanyɓe am.

²⁰ A anndi kuudi dow am, mbustu am e toskaare am, a anndi konne'en am fuu.

²¹ Kuudi torri yam ɓernde, mi tampuɗo, mi tammino heɓugo enɗam, ammaa mi heɓaay ɗam, mi ɗaɓɓiti de'itinooɓe yam, ammaa walaa mo keɓmi.

²² Ɓe mbaɗi tooke nder nyaamdu am, ɓe njarni yam lammuɗam saa'i mi ɗomɗuɗo.

²³ Nyaamɗe maɓɓe laatano ɓe ngamngam! Ngam hoɗɓe maɓɓe boo ɗum laato tuuforgol!

²⁴ Gite maɓɓe mbuma, ngam taa ɓe ngi'a! Ɓaawe maɓɓe tampa foroy!

²⁵ Ruf tikkere ma dow maɓɓe! Caatal maare heɓa ɓe!

²⁶ Joole maɓɓe laato bille! Taa goɗɗo lutta nder cuuɗi laymaaji maɓɓe!

²⁷ Ngam ɓe ɗon toonyo yimɓe ɓe a hiiti bee hoore ma, ɓe ɗon ngooyna torra yimɓe ɓe naawnuɗa.

²⁸ Winndu aybeeji maɓɓe fuu, taa yaafa ɓe sam.

²⁹ Ittu inɗe maɓɓe diga deftere ngeendam, taa limdu ɓe bee adili'en.

³⁰ Min mi toskaaɗo, mi torriiɗo, hisnam, yaa Allah, daaynam bee konne'en am.

³¹ Mi maŋgtan innde Allah bee yimre, mi teddinan mo bee gettooje.

³² Kanjum ɓuran fottango Jawmiraawo dow ngaari, koo ngaari kalhaldi boo.

³³ To toskaaɓe ngi'i ɗum, ɓe ceyoto, ɓaditooɓe Allah boo keɓan juutal balɗe.

³⁴ Ngam Jawmiraawo ɗon heɗito do'aaje laafuɓe, o meeriɗintaa yimɓe maako haɓɓaaɓe.

³⁵ Maŋgte Allah, onon asamanji e lesdi, onon beeli e ko waancata nder mooɗon fuu.

³⁶ Ngam Allah hisnan Siyona, o nyiɓtoto berniiji Yahuuda. Yimɓe maako njooɗoto ton, maran lesdi ndi'i.

³⁷ Danygol jagganiiɓe mo ronan ndi, yiɗɓe innde maako njooɗoto nder maari.