Jabuura 67 - Fulfulde Bible

Sey ummaatooje maŋgta Allah

¹ Ngam kaliifaajo gime: Bee moolooji. Yimre.

² Yaa Allah, hinna min, barkiɗin min, woonan min!

³ Ngam haa duniyaaru fuu annda no kuuwrata kuuɗe ma, ummaatooje fuu annda an woni kisnoowo!

⁴ Sey ummaatooje maŋgte, yaa Allah! Sey ummaatooje fuu maŋgte!

⁵ Sey jama'aaje ngima bee seyo e welwelo! Ngam a ɗon hiito ummaatooje bee kiita ndarnuka, a ɗon ɗowa jama'aaje nder duniyaaru.

⁶ Sey ummaatooje maŋgte, yaa Allah! Sey ummaatooje fuu maŋgte!

⁷ Lesdi waɗi ƴaamle muuɗum, Allah, Allah meeɗen barkiɗina en.

⁸ Allah barkiɗina en! Yimɓe duniyaaru fuu kula mo!