Jabuura 64 - Fulfulde Bible

Tornde ngam aynol diga konne'en suuɗiiɓe

¹ Ngam kaliifaajo gime. Yimre Daawuda.

² Yaa Allah, heɗita siŋkuye am! Mi ɗon hula konne'en am, hisnu yoŋki am!

³ Hisnam dabareeji halluɓe e mooɓre waɗooɓe zunuuba.

⁴ Ɓe mbelni ɗemɗe maɓɓe bana kaafaaje, bolle maɓɓe kaaɗɗe ɗon bana kuri ɗi ɓe taaskoto fiɗugo.

⁵ Ɓe ɗon mbaali haa nyukkorɗe ngam ɓe piɗa goɗɗo mo walaa aybe, ɓe piɗan bee juhuki, ɓe kulataa.

⁶ Ɓe ɗon tiɗɗina ɓerɗe maɓɓe waɗugo kalluɗum, ɓe ɗon carwootira haa ɓe mbaɗata tuuforli, ɓe ɗon mbi'a: “Moy yi'ata ɗi?”

⁷ Ɓe ɗon nufo kuuje kalluɗe, ɓe ɗon numa walaa mo heɓtata dabare maɓɓe. Walaa mo waawata linyugo lugguɗum ɓernde neɗɗo.

⁸ Ammaa Allah fiɗan ɓe bee juhuki. Ndaa, kuri maako naawni ɓe.

⁹ Bolle maɓɓe ndo'i ɓe. Koo moy yi'i ɗum, dimmban hoore.

¹⁰ Yimɓe fuu kultoran, ɓe mbolwan ko Allah waɗi, ɓe paaman kuuɗe maako.

¹¹ Adili'en ceyorto Jawmiraawo, ɓe nyukkoto haa maako, gooŋɗa-ɓerɗe'en fuu mantorto mo.