Jabuura 63 - Fulfulde Bible

Yenwugo Allah

¹ Yimre Daawuda, yaake o ɗonno nder ladde hamaadaare haa Yahudiya.

² Yaa Allah, an woni Allah am, mi yiɗi ɗakkotirgo bee ma masin, mi ɗon yenwa gondal bee maaɗa. Mi ɗon nder lesdi njoorndi laatiindi harde ndi walaa ndiyam, ɓanndu am fuu ɗon yenwe.

³ Mi laari ma nder suudu ma seniindu, mi yi'i baawɗe ma e tedduŋgal ma.

⁴ Ngam mbooɗeeŋga ma ɓuri ngeendam, ngam man mi maŋgtete.

⁵ Mi maŋgtete balɗe am fuu, bee innde ma, mi ɓaŋgtan juuɗe am ngam toraago ma.

⁶ Ɓernde am welweltan bana caftuɗo nyaamduuji ɓurɗi welugo, hunnduko am yettete bee seyo.

⁷ Mi siftorte to mi waalake dow be'itte am, mi numtan haala ma jemmaare fuu.

⁸ Ngam an woni balloowo yam, mi yiman bee seyo les bileeji ma.

⁹ Mi ɗon ɗakkotiri bee ma, nyaamo ma ɗon jogi yam.

¹⁰ Ammaa yiɗɓe mbarugo yam, ɓe nastan joonde maayɓe.

¹¹ Kaafahi mbaran ɓe, ɓe laatoto geɗal cuuli.

¹² Laamiiɗo seyoto ngam daliila Allah, hunortooɓe innde maako mantoto, ngam o sukkan kunnduɗe fewooɓe.