Jabuura 61 - Fulfulde Bible

Allah woni aynoowo laamiiɗo

¹ Ngam kaliifaajo gime bee moolooji. Yimre Daawuda.

² Yaa Allah, nan gookaali am! Heɗita tornde am!

³ Diga keerol duniyaaru, mi ɗon toro ma, ɓernde am ta'i, yahram dow tapaare hisnoore townde, haa mi waawataa yottaago bee semmbe am.

⁴ Ngam an woni hisrude am, a ayni yam diga juuɗe konneejo am bana suudu semmbiɗndu towndu.

⁵ Accu mi jooɗo nder suudu laymaaru ma haa foroy, mi suuɗo les bileeji ma.

⁶ A nani togayeeje am, yaa Allah, a hokki hulɓe innde ma maral.

⁷ Juutin balɗe laamiiɗo, ɓesdan mo duuɓi haa foroy!

⁸ Tabitin leeso laamu maako yeeso maaɗa haa foroy, aynu mo bee mbooɗeeŋga ma e gooŋgaaku ma!

⁹ Min kam mi yiman maŋgtoore innde ma haa foroy! Nyalɗe fuu mi hebbinante togayeeje am!