Jabuura 6 - Fulfulde Bible

Tornde nder wakkati ɓillaare

¹ Ngam kaliifaajo gime, bee moolooji marɗi ɓoggi joweetati. Yimre Daawuda.

² Yaa Jawmiraawo, taa hiitam nder tikkere ma, taa ɓoccam nder ɓernuki ma!

³ Enɗam, yaa Jawmiraawo, ngam mi tampuɗo! Yamɗitinam, yaa Jawmiraawo, ngam i'e am ɗon ndiwna,

⁴ nafsu am fuu ɗon diwna! Haa ndeye, yaa Jawmiraawo!

⁵ Wartu, yaa Jawmiraawo, hisnam! Wallam ngam daliila mbooɗeeŋga ma.

⁶ Ngam wonɓe nder joonde maayɓe ciftortaa ma, moy maŋgtete ton?

⁷ Mi uumi haa mi somi, jemma fuu gonɗi coofni be'itte am. Mi ɗon waalo nder gonɗi am.

⁸ Gite am mbonni ngam bojji, ɗe tampi ngam daliila konne'en am.

⁹ Ndaayeeɗam, onon waɗooɓe zunuuba fuu! Ngam Jawmiraawo nani bojji am.

¹⁰ Jawmiraawo heɗiti tornde am, Jawmiraawo jaɓi do'aare am.

¹¹ Konne'en am fuu cemtan, ɓe ndiwnan, ɓe loroto ɓaawo. Nder ma'annde yiitere ɓe cemtan.