Jabuura 59 - Fulfulde Bible

Allah woni semmbe am e hisrude am townde

¹ Ngam kaliifaajo gime fodde daande “Taa wonnu”. Yimre Daawuda. O winndi nde ɓaawo Sawulu neli yimɓe ngam aynugo saare maako, ngam mbarugo mo.

² Yaa Allah am, hisnam juuɗe konne'en am, daaynam bee ummantooɓe yam.

³ Wurtinam juuɗe waɗooɓe zunuuba, hisnam juuɗe rufooɓe ƴiiƴam.

⁴ Ngam ndaa ɓe ɗon mbaaltani yam, haa ɓe itta yoŋki am, yimɓe semmbiɗɓe ɗon carwootira dow am. Ammaa min mi tuurtanaay ma, mi waɗaay hakke, yaa Jawmiraawo.

⁵ Walaa aybewol ngol mbaɗmi, ɓe ɗon njaawɗo, ɓe ɗon taasko ukkanaago yam. Umma! War haa am yaa Allah! Laar!

⁶ Yaa Jawmiraawo, an woni Allah honooɓe asama, Allah Isra'iila. Umma, hiita heefeerɓe fuu! Taa enɗa zammbotooɓe, halluɓe ɓe'e sam!

⁷ Kiikiiɗe ɓe ɗon lorta, nguuro bana dawaaɗi, ɓe ɗon taaro berniwol.

⁸ Ndaa kunnduɗe maɓɓe ɗon keewi halleende, ɗemɗe maɓɓe nanndi bee kaafaaje, ɓe ɗon mbi'a: “Moy nanata en?”

⁹ Ammaa an, yaa Jawmiraawo, a ɗon jala ɓe, a ɗon janca heefeerɓe fuu.

¹⁰ An woni semmbe am, ngam mi ɗon hooli ma, an woni hisrude am townde, yaa Allah,

¹¹ a waran haa am, yaa Allah mo woonantam, a yi'natam do'ere konne'en am.

¹² Taa mbar ɓe, ngam taa ummaatoore am yejjita ɗum. Saŋkitit ɓe bee baawɗe ma! Do'u ɓe, yaa Jawmiraawo, wawarde amin.

¹³ Ɓe ɗon mbaɗa hakke nder bolle maɓɓe fuu. Mawnitaare maɓɓe do'a ɓe, ngam ɓe ɗon pewa, ɓe ɗon naala.

¹⁴ Nattin ɓe bee ɓernuki ma, nattin ɓe, taa koo gooto maɓɓe lutta! Nden ɓe anndan Allah woni laamiiɗo dow danygol Yaakubu, o laamiiɗo dow keeri duniyaaru fuu.

¹⁵ Kiikiiɗe ɓe ɗon lorta, nguuro bana, ɓe ɗon taaro berniwol.

¹⁶ Ɓe ngiiloto koo toy fuu ngam tefugo nyaamdu, ammaa to ɓe kaaraay, ɓe mbaalan ngurŋgurtugo.

¹⁷ Min kam, mi maŋgtan baawɗe ma! Fajiri mi seyorto mbooɗeeŋga ma. Ngam an a laatanake yam hisrude townde, a nyukkorde am nder wakkati ɓillaare am.

¹⁸ An woni semmbe am, mi yimante. Ngam an woni hisrude am townde, yaa Allah mo woonantam!