Jabuura 58 - Fulfulde Bible

Tornde ngam kiita dow kalluɗo

¹ Ngam kaliifaajo gime fodde daande “Taa wonnu”. Yimre Daawuda.

² Onon mawɓe, on ɗon kiitoro gooŋga bee jeeɗaago na? On ɗon mbaɗana ɓiɓɓe Aadama kiita ngooŋɗuka na?

³ Walaa! On ɗon kiito bee sooynde adilaaku bee anniya, on ɗon mbaɗa toonyaare nder lesdi.

⁴ Halluɓe mbonnake diga reedu daada muuɗum'en, fewooɓe ɗon mboofa diga danyeeki muuɗum'en.

⁵ Ɓe keewi tooke bana poosokje, ɓe ɗon cukka noppi maɓɓe bana culanndi pahri,

⁶ ndi nanataa sawtu pijiroowo ndi, koo sawtu annduɗo bolle hiilugo ndi.

⁷ Yaa Allah, yew nyii'e maɓɓe! Fusu galaŋge barooɗe ɗe'e, yaa Jawmiraawo!

⁸ Sey ɓe majja bana ndiyamji ilanɗi, kuri ɗi ɓe piɗata, taa ɗi kaldo.

⁹ Ɓe njoora bana ɓii hoonyoldu wurtiindu suudu maaru, ɓe laato bana ɓiŋngel dufaaŋgel ngel meeɗaay yi'ugo naaŋge.

¹⁰ Hiddeko payanɗe mooɗon ngaywa, Allah ruuynan leɗɗe koo jamnaaɗe koo ɗe njamnaaka, gonɗe les maaje.

¹¹ Adiliijo seyoto to o yi'i no Allah waatirto halluɓe, o lootan kosɗe maako bee ƴiiƴam hakke'en.

¹² Yimɓe mbi'an: “Fakat, adiliijo heɓan mbarjaari! Fakat Allah kiitoowo duniyaaru ɗon!”