Jabuura 57 - Fulfulde Bible

Maŋgtoore saa'i toonyaare

¹ Ngam kaliifaajo gime, fodde daande “Taa wonnu”. Yimre Daawuda. O winndi nde ɓaawo o doggi Sawulu, o nyukki nder lowol.

² Hinnam, yaa Allah, hinnam! Ngam haa maaɗa nyukkotoomi. Mi suuɗoto les bileeji ma, sey to sarru saalake.

³ Mi ɗon wookana Allah Ɓaŋiiɗo, kaŋko o timminan haala am jam.

⁴ Diga asama Allah neldatam kisndam, o do'an taasnanɗo yam, o waŋginantam mbooɗeeŋga e gooŋgaaku maako.

⁵ Mi ɗon caka barooɗe, mi ɗon waali caka dabbaaji kalluɗi nyaamanɗi yimɓe. Nyii'e maaji nanndi bee labbe e kuri, ɗemɗe maaji nanndi bee kaafaaje belɗe.

⁶ Yaa Allah, maŋngu ma ɓaŋgo dow asamanji! Tedduŋgal ma ɓaŋgo dow duniyaaru fuu!

⁷ Konne'en am tuufani yam tuuforgol, seɗɗa mi do'o nder maagol. Ɓe ngasi ngaska haa laawol am, ammaa ɓe njolli nder maaka bee ko'e maɓɓe.

⁸ Mi hoolake ma, yaa Allah, mi hoolake ma fakat! Mi yiman, mi maŋgtete.

⁹ Hiddeko weeta, mi fina, mi fiya moolooru am bee hoodu am!

¹⁰ Mi yettete caka ummaatooje, yaa Jawmiraawo! Mi yimante caka jama'aaje!

¹¹ Ngam mbooɗeeŋga ma yottake asamanji, gooŋgaaku ma boo yottake duule.

¹² Yaa Allah, maŋngu ma ɓaŋgo dow asamanji! Tedduŋgal ma ɓaŋgo dow duniyaaru fuu!