Jabuura 56 - Fulfulde Bible

Do'aare Daawuda kooliiɗo Allah yeeso taasnooɓe mo

¹ Ngam kaliifaajo gime, bana yimre “Poola dow leɗɗe mawɗe daayiiɗe”. Daawuda winndi yimre nde'e ɓaawo Filisti'en naŋngi mo haa Gaat.

² Hinnam, yaa Allah, ngam yimɓe ɗon taasnammi, tum hippooɓe ɗon ɓillammi.

³ Nde weeti fuu konne'en am ɗon taasnammi, yaa Ɓaŋiiɗo, ɗuuɗɓe ɗon kippo yam.

⁴ Ammaa to mi hultori, an mi hooloto.

⁵ Mi ɗon maŋgta Allah daliila wolde mum, mi ɗon hoolo mo, mi hulataa koo ɗume. Ɗume neɗɗo waawata waɗugo yam?

⁶ Nde weeti fuu, konne'en am ɗon kallina bolle am, foroy ɓe ɗon nufo sarru dow am.

⁷ Ɓe ɗon kaɓɓa dabare, ɓe ɗon korammi, ɓe ɗon ayna palanɗe am, haa ɓe mbarammi.

⁸ Ɓe mbaɗi zunuuba. Nden kam ɓe kisan na? Yaa Allah, do'u ummaatooje ɗe'e bee tikkere ma.

⁹ A limi nyalɗe ɗe ndoggumi yeeso konne'en am, a mooɓti gonɗi am fuu nder faandu ma, a winndi limgal maaji nder deftere ma.

¹⁰ Nyalaade nde mi toroto ma, konne'en am loroto ɓaawo. Mi anndi fakat, an, yaa Allah, a ɗon wondi bee am.

¹¹ Mi ɗon mantoro Allah daliila wolde mum, mi ɗon maŋgta Allah daliila wolde mum, mi ɗon maŋgta Jawmiraawo daliila wolde mum.

¹² Mi ɗon hoolo Allah, mi hulataa koo ɗume. Ɗume neɗɗo waawata waɗugo yam?

¹³ Yaa Allah, sey mi hebbinane togayeeje am, mi lii'ano ma gettooje.

¹⁴ Ngam a hisni yoŋki am e maayde, a ayni kosɗe am, ngam taa mi do'o. Ngam haa mi yaha yeeso Allah nder annoora ka yaynanta yeeɗɓe.