Jabuura 55 - Fulfulde Bible

Tornde zammbaaɗo

¹ Ngam kaliifaajo gime bee moolooji. Yimre Daawuda ekkitinoore.

² Yaa Allah, heɗita do'aare am, taa sala nanugo tornde am!

³ Nanam, jaabam! Mi cakliiɗo, mi ɗon siŋka, mi ɗon yiilo koo toy,

⁴ daliila purka konne'en am e toonyaare halluɓe. Ɓe ɗon ukka halkere dow am, ɓe ɗon taasnammi bee nganyŋgu e tikkere.

⁵ Ɓernde am ɗon diwna, kulol maayde ukkanake yam.

⁶ Kultoreeŋgol e diwŋgol naŋngi yam, kulol caatuŋgol suddi yam.

⁷ Mi wi'i: “To mi woodino bileeji bana poola, mi fiiranno, mi jooɗoyo ego!

⁸ Mi fiiranno daayiiɗum, mi yahanno mi hoɗoya nder ladde.

⁹ Mi yaawanno haa mi hisa henndu saatundu bee law.”

¹⁰ Jiiɓu hakkiilooji e ɗemɗe maɓɓe, yaa Allah! Ngam mi ɗon yi'a toonyaare e jokkirgol nder berniwol.

¹¹ Jemma e naaŋge fuu ɓe ɗon taaro ngol dow mahol maagol, ngol heewi zunuuba e zammba.

¹² Halkere ɗon nder maagol, ɓillaare e rikici ceedataa bee luumo maagol.

¹³ To ɗum konneejo am mo huɗi yam, mi munyananno mo. To ɗum ganyɗo yam mo ummani yam, mi heɓanno suuɗaago yeeso maako.

¹⁴ Ammaa ɗum an, goɗɗo nannduɗo bee am! Soobaajo am mo anndumi laaɓɗum!

¹⁵ En njooɗodino nder kawtal booɗŋgal, en njahduno haa suudu Allah nder mooɓre.

¹⁶ Sey waade juha konne'en am! Ɓe nasta joonde maayɓe ɓe yeeɗɓe! Ngam halleende heewi ɓerɗe maɓɓe.

¹⁷ Ammaa min mi ɗon wookana Allah, Jawmiraawo hisnatam.

¹⁸ Maŋngariba e fajiri e caka nyalawma fuu mi ɗon siŋka, mi ɗon uuma, o ɗon nanammi.

¹⁹ O hooratam jam diga konuuji am bee konne'en am ɗuuɗɓe.

²⁰ Diga ɓooyma Allah woni laamiiɗo. Kaŋko o nanatam, o semtinan ɓe, ngam ɓe mbootataa, ɓe kulataa Allah.

²¹ Kawtunooɗo bee am go ummani sooba'en mum, fiisti alkawal ngal o haɓɓuno bee maɓɓe.

²² Bolle maako ɓuri leeɓol ɗelmugo, ammaa ɓernde maako heewi konu! Bolle maako ɗon ila bana nebbam, ammaa ɗe ta'an bana kaafaaje belɗe!

²³ Yowan Jawmiraawo doŋngal ɓernde ma, o jogoto ma, o accataa koolaaɗo maako dimmbo sam.

²⁴ Ammaa an, yaa Allah, a wuboto ɓe nder ngaska halkere, rufooɓe ƴiiƴam e rikici'en njottataako reeta balɗe maɓɓe. Ammaa min kam, mi ɗon hoolo ma.