Jabuura 54 - Fulfulde Bible

Tornde ngam kiita ndarnuka

¹ Ngam kaliifaajo gime bee moolooji. Yimre Daawuda ekkitinoore.

² O winndi nde ɓaawo Zifa'en njehi haa Sawulu, mbi'i mo: “Daawuda ɗon nyukki haa amin.”

³ Yaa Allah, hisnam bee baawɗe innde ma! Waɗanam kiita ndarnuka bee semmbe ma!

⁴ Yaa Allah, jaɓ tornde am, heɗita bolle am!

⁵ Ngam jananɓe ummanake yam, toonyooɓe ngiɗi mbarugo yam, walaa ko yaali ɓe bee Allah.

⁶ Ammaa ndaa Allah woni balloowo yam. Jawmiraawo ɗon wondi bee wallooɓe yam.

⁷ Halleende konne'en am loro dow ko'e muuɗum'en, nattin ɓe fodde gooŋgaaku ma!

⁸ Yaa Jawmiraawo, mi lii'anto ma kirseteeɗi bee seyo, mi maŋgtan innde ma, ngam a booɗɗo.

⁹ Ngam a hisni yam ɓillaaje am fuu, gite am ngi'i halkere konne'en am.