Jabuura 53 - Fulfulde Bible

Faataare e halleende yimɓe

¹ Ngam kaliifaajo gime. Yimre Daawuda ekkitinoore fodde daande “mahalat”.

² Faataaɓe ɗon mbi'a: “Allah walaa!” Fakat ɓe mbonnake, ɓe ɗon mbaɗa sooynde adilaaku hulniinde. Walaa baɗanɗo ko wooɗi, walaa koo gooto!

³ Diga asama, Allah jimmiti, o ɗon laara ɓiɓɓe Aadama, haa o yi'a to woodi marɗo hakkiilo, ɓaditanɗo mo.

⁴ Ammaa ɓe fuu ɓe celi laawol gooŋga, ɓe mbonnake. Walaa baɗanɗo ko wooɗi, walaa koo gooto!

⁵ “Waɗooɓe zunuuba ɓe'e fuu, ngalaa hakkiilo na? Ɓe ɗon nyaama ummaatoore am bana nyaamugo nyaamdu, ammaa ɓe ewnataa innde Allah.”

⁶ Kanjum ɓe ndiwnan ngam kulol, koo to daliila kulol walaa. Allah saŋkitan i'e hippooɓe ma, ɓe mbustan, ngam Allah wudini ɓe.

⁷ Moy hokkata kisndam haa Isra'iila diga Siyona? To Allah wartiri ummaatoore muuɗum diga jeyaaŋgu, nden kam danygol Yaakubu welweltan, Isra'iila seyoto.