Jabuura 51 - Fulfulde Bible

Tornde tuubu Daawuda

¹ Ngam kaliifaajo gime. Yimre Daawuda.

² O winndi nde yaake Natan annabiijo wari haa maako, ɓaawo o waɗi njeenu bee Bat-Seeba.

³ Hinnam, yaa Allah, fodde mbooɗeeŋga ma! Fodde hinnuye ma ɗuuɗɗo, wilu tuurtolji am!

⁴ Lootu aybe am fuu! Laɓɓinam tal diga hakke am!

⁵ Ngam mi faami tuurtolji am, mi ɗon yi'a hakke am tum.

⁶ Dow maaɗa tan mbaɗmi aybe, mi waɗi kalluɗum yeeso ma. Ngam maajum, a adiliijo to a feli yam, a felataake to a hiitake yam.

⁷ Fakat mi danyaaɗo nder zunuuba, diga daada am reedi yam, mi ɗon nder hakke.

⁸ Ammaa an, a ɗon seyora gooŋga nder lugguɗum ɓernde, hebbin numooji am bee hikma maaɗa.

⁹ Ittu hakke am bee haako isop, nden kam mi laaɓan. Lootu aybe am, nden kam mi ranwan tal bana mallimallooje.

¹⁰ Accu mi nana hoolo seyo e welwelo, haa mi maata seyo fahin, ɓaawo a hiiti yam kiita naawka.

¹¹ Wiirnu gite ma ngam taa ngi'a hakkeeji am, wilu aybe am fuu.

¹² Yaa Allah, taganam ɓernde laaɓnde! Hesɗitin ruuhu nder am, haa mi ɗakko ma booɗɗum!

¹³ Taa riiwam daayiiɗum diga yeeso ma, taa ittanam Ruuhu ma Ceniiɗo!

¹⁴ Seynam bee kisndam ma fahin, hokkam ruuhu yaŋkinaare heedi ma.

¹⁵ Nden kam mi ekkitinan tuurtanɓe ma laabi ma, hakke'en boo lortoto haa maaɗa.

¹⁶ Yaa Allah, Allah Kisnoowo yam, hisnam ngam mi rufi ƴiiƴam! Min boo mi maŋgtete bee hoolo seyo ngam adilaaku ma!

¹⁷ Yaa Jawmiraawo, maɓɓitu hunnduko am haa mi wooyna maŋgtoore ma.

¹⁸ Ngam a seyortaako kirseteeɗi, to naa non mi lii'antono ma ɗi, guleteeɗi pottantaa ma.

¹⁹ Dokkal pottananŋgal ma, ɗum ɓernde suniinde, ɓernde suniinde, mimsitannde hakkeeji, a salataako nde, yaa Allah.

²⁰ Woonan Siyona fodde mo'ere ma! Nyiɓta mahi Urusaliima!

²¹ Nden a seyorto kirseteeɗi pottuɗi, waato guleteeɗi, ɓe lii'oto ga'i dow hirsirde ma.