Jabuura 49 - Fulfulde Bible

Hoolaago risku ɗum faataare

¹ Ngam kaliifaajo gime. Gimol ngol ɓiɓɓe Koora.

² Nane ɗu'um, onon ummaatooje fuu! Keɗite, onon yimɓe duniyaaru fuu,

³ mawɓe e leesɓe, riskuɓe e talaka'en fuu!

⁴ Hunnduko am wolwan bolle hikma. Ɓernde am numan numooji kakkilɗi.

⁵ Mi heɗititto balndol, mi waŋginan ko saawi nder annditanamwol am, saa'i mi ɗon fiya moolooru.

⁶ Ngam ɗume kulanmi nder nyalɗe sarru, to halleende waɗooɓe yam rikici taarake yam?

⁷ Kamɓe ɓe ɗon ɓaaroro jawdi maɓɓe, ɓe ɗon mantoro risku maɓɓe ɗuuɗŋgu.

⁸ Ammaa walaa mo waawata soottugo goɗɗo, walaa mo waawata yoɓugo Allah coottaari yoŋki mum.

⁹ Ngam coottaari yoŋki maako saɗi masin, koo ndey ndi heɓataako.

¹⁰ Ndi hisnataa mo ngaska lugguka, haa o tokko yeeɗugo haa foroy.

¹¹ Ɓe ɗon ngi'a koo hikma'en boo maayan bana humaki'en e faataaɓe fuu, ɓe accanan woɗɓe jawdi maɓɓe.

¹² Ɓe ɗon numa joole maɓɓe tabitan haa foroy, ɓe njooɗoto ton haa abada. Ɓe inndi lesɗe mawɗe inɗe maɓɓe.

¹³ Ammaa neɗɗo bee maŋngu muuɗum fuu, duurataa, o halkan bana dabbaaji kalkirta.

¹⁴ Ndaa nii laawol e faataare hooliiɓe ko'e muuɗum'en mba'i, ndaare timmoode seyortooɓe bolle muuɗum'en mawnitiiɗe:

¹⁵ Ɓe yahreteeɓe haa joonde maayɓe bana baali, waade duran ɓe. Fajiri gooŋga'en ndamman ɓe, jaati maɓɓe wonnoto, joonde maayɓe laatoto saare maɓɓe.

¹⁶ Ammaa Allah hisnan yoŋki am diga joonde maayɓe, ngam o hoocatam.

¹⁷ To goɗɗo riski, to tedduŋgal saare maako ɗon ɓesdo, taa hul,

¹⁸ ngam to o maayi, o hoocataa koo ɗume bee maako, tedduŋgal maako tokkataako mo nder yenaande.

¹⁹ Koo to o maŋgtuno hoore maako saa'i o geeto, koo to woɗɓe teddinno mo ngam o heɓi hayru,

²⁰ fakat o hawtoyan bee kaakiraaɓe maako nder joonde maayɓe, ɓe fuu ɓe meetataa yi'ugo naaŋge haa foroy.

²¹ Neɗɗo bee maŋngu muuɗum fuu, o walaa faamu, o halkan bana dabbaaji kalkirta.