Jabuura 47 - Fulfulde Bible

Allah woni laamiiɗo duniyaaru fuu

¹ Ngam kaliifaajo gime. Yimre nde ɓiɓɓe Koora.

² Onon ummaatooje fuu, kelle juuɗe, teddine Allah bee hoolo seyo!

³ Ngam Jawmiraawo Ɓaŋiiɗo, o kuleteeɗo, o laamiiɗo mawɗo dow duniyaaru fuu!

⁴ O leesnani en jama'aaje, o ɗowtinani en ummaatooje!

⁵ O suɓani en maral meeɗen, en ceyori ɗum, enen danygol Yaakubu ngol o yiɗi.

⁶ Allah wa'ake leeso laamu mum, caka hoolo e fuufaaŋgo luwe.

⁷ Ngime! Ngimane Allah men maŋgtooje! Ngime! Ngimane laamiiɗo men maŋgtooje!

⁸ Ngam Allah woni laamiiɗo duniyaaru fuu, ngimane mo yimre ɓurnde wooɗugo.

⁹ Allah ɗon jooɗi dow leeso laamu mum seniiŋgo. O ɗon laamano ummaatooje fuu.

¹⁰ Mawɓe ummaatooje ɗon mooɓo hawtaade bee ummaatoore Allah mo Ibrahiima. Ngam Allah jeyi bawarɗe duniyaaru, o ɓaŋiiɗo masin.