Jabuura 45 - Fulfulde Bible

Gimol ngam teegal laamiiɗo

¹ Ngam kaliifaajo gime. Fodde daande “gurguli”. Gimol yiide, ekkitinoowol, ngol ɓiɓɓe Koora.

² Ɓernde am ɗon ɓula bolle belɗe, sey mi yimana laamiiɗo gimol am. Ɗemŋgal am laato binndirgol binndoowo goniijo.

³ A ɓuri ɓiɓɓe Aadama fuu wooɗugo, barkaama. A wela-ɗemŋgaljo, Ngam man Allah barkiɗini ma haa foroy.

⁴ Wakka kaafahi ma, an, konoowo cuusɗo, marɗo maŋngu e daraja.

⁵ Wa'a moota pucci ma bee daraja, jaala, ngam daliila gooŋga e yaŋkinaare e adilaaku! Nyaamo ma huuwa kuuɗe kaayeefiije!

⁶ Kuri ma ceeɓɗi njuwa ɓerɗe konne'en ma, ummaatooje ndo'o yeeso maaɗa!

⁷ Leeso laamu maaɗa yaa Allah, duumoto haa foroy, a laamoto nder laamu ma bee kiita ndarnuka.

⁸ A yiɗi adilaaku, a ɗon wanya halleende. Ngam man, Allah, waato Allah maaɗa moyti ma, hokki ma seyo ko ɓuri wonduɓe bee maaɗa fuu.

⁹ Baɗaadi e uurle belɗe feere feere ɗon dow limce ma, fiyooɓe moolooji ɗon ceyna ɓernde ma nder laamorde ma nyiɓraande bee nyii'e nyiibi.

¹⁰ Ɓiɓɓe laamiiɓe rewɓe ɗon caka yiɗaaɓe ma, haa nyaamo ma daada saare ɗon dari, o pawnoriiɗo bee kaŋŋeeri iwndi diga Ofir.

¹¹ Ɓiŋngel am, laar e nan ko mbi'anmaami: Yejjitit ummaatoore ma e saare baaba ma.

¹² Laamiiɗo yiɗe daliila ŋarol ma! Kaŋko woni jawma, tuggan mo koppi!

¹³ Yimɓe Tirus ngaddante dokke, riskuɓe nder ummaatoore ɗaɓɓitan yerduye ma.

¹⁴ Ndaa, mayramjo, ɓaŋgeteeɗo laamiiɗo ɗon nasta, o booɗɗo masin. Limce maako tuppitaama bee kaŋŋeeri.

¹⁵ O ɓorniiɗo limce booɗɗe tuppitaaɗe, ɓe ɗon njahra mo haa laamiiɗo. Faanyɓe, sappiraaɓe maako ɗon tokko mo, ɓe njahraama yeeso maaɗa.

¹⁶ Ɓe ɗon njahra ɓe bee seyo e welwelo, ɓe ɗon nasta laamorde.

¹⁷ Barkaama, ɓiɓɓe ma njooɗoto dow leeso laamu kaakiraaɓe muuɗum'en, a ardinan ɓe dow lesdi fuu!

¹⁸ Mi siftinoran gide garanɗe fuu innde ma, ngam man ummaatooje maŋgtete haa foroy.