Jabuura 38 - Fulfulde Bible

Tornde toonyaaɗo

¹ Yimre Daawuda ngam ciftinorki.

² Yaa Jawmiraawo, taa hiitam bee tikkere ma, taa ɓoccam nder ɓernuki ma!

³ Ngam kuri ma piɗi yam, juŋngo ma teddani yam.

⁴ Ngam daliila tikkere ma mi walaa njamu, i'e am nyawi ngam hakkeeji am.

⁵ Ngam aybeeji am towi ɓuri darnde am. Ɗi teddani yam bana doŋngal tedduŋgal.

⁶ Kuuduuje am nyoli, ɗon kacca, ngam daliila faataare am.

⁷ Mi turiiɗo, mi tampi masin, mi ɗon nyalla nder mettamɓeram.

⁸ Ɓooƴe am ɗon ngula bana yiite, ɓanndu am walaa njamu sam.

⁹ Mi tampuɗo masin, semmbe am fuu jinni, ɓernde am torrake, mi ɗon otta ngam bone.

¹⁰ Yaa Jawmiraawo, a anndi ko ngiɗmi, uumaali am fuu cuuɗanaaki ma!

¹¹ Ɓernde am ɗon fiita, semmbe am jinni, gite am purɗi.

¹² Soobiraaɓe am e wondunooɓe bee am ndaayake yam ngam daliila kuuduuje am koo banndiraaɓe am boo ndaaytake yam masin.

¹³ Yiɗɓe mbarugo yam ɗon tuufna tuuforli, tefanɓe sarrugo yam ɗon mbolwa ngam halkugo yam, ɗon nyalla haɓɓugo dabareeji dow am.

¹⁴ Min mi laatake bana paho, mi nanataa, mi ɗon bana muukaajo, mi wolwataa.

¹⁵ Mi laatake bana goɗɗo mo nanataa, mo waawataa jaabaago.

¹⁶ Mi tammorake ma, an, yaa Jawmiraawo! Jawmiraawo Allah am, an jaabanto yam!

¹⁷ Ngam mi wi'i: Taa konne'en am ceyo daliila am, taa ɓe mawnito to kosɗe am ndimmbake.

¹⁸ Ngam mi ɓadake do'aago, naaworlaaji am accaay yam.

¹⁹ Ngam, mi ɗon waŋgina aybe am, mi cakliiɗo ngam daliila hakke am.

²⁰ Konne'en am ɗon ngeeɗa booɗɗum, ɓe semmbiɗɓe, wanyɓe yam bilaa hujja, ɓe ɗuuɗɓe.

²¹ Warjotooɓe mbooɗeeŋga am bee halleende ɗon kaadanammi, ngam mi yiɗi waɗugo ko fotti.

²² Taa wudinam, yaa Jawmiraawo! Taa daayam, yaa Allah am!

²³ Yaawɗa war wallam! Yaa Jawmiraawo, Kisnoowo yam!