Jabuura 36 - Fulfulde Bible

Mbooɗeeŋga Allah e halleende halluɓe

¹ Yimre Daawuda, jaggiiɗo Jawmiraawo. Ngam kaliifaajo gime.

² Mi ɗon siftora wolde nde kalluɗo wolwi nder tuurtol mum, o hulataa Allah sam.

³ Ngam o ɗon manta hoore maako, haa o waawataa anndititgo aybe maako, o wanyataa nde.

⁴ Ko o wolwata fuu, ɗum halleende e fewjere, o acci ɗaɓɓititgo hikma, o meetataa waɗugo ko fotti bee hikma.

⁵ Dow be'itte maako o ɗon nufo kuuje kalluɗe, o ɗon tokko laawol kalluŋgol, o senndirtaa bee halleende.

⁶ Yaa Jawmiraawo, mbooɗeeŋga ma yottoto asamanji, bana non boo gooŋgaaku ma.

⁷ Adilaaku ma tabiti bana kooseeje towɗe, kiitaaji ma nanndi bee mbeela lugguka. Jawmiraawo, a ɗon hisna yimɓe e dabbaaji.

⁸ Yaa Jawmiraawo, mbooɗeeŋga ma woodi saman masin, ɓiɓɓe Aadama ɗuwoto haa ɗowdi bileeji ma.

⁹ Ɓe kaaran nyaamduuji ɗuuɗɗi haa saare ma, a yarnan ɓe haa njaramji ma ɗuuɗɗi belɗi.

¹⁰ Ngam haa maaɗa seeɓoore ngeendam fuu iwi, ngam daliila annoora ma min ɗon ngi'a annoora.

¹¹ Tokka waŋgingo mbooɗeeŋga ma haa annduɓe ma e adilaaku ma haa gooŋɗa-ɓerɗe'en.

¹² Taa accu mawnitiiɓe njokkammi, taa accu halluɓe ndiiwammi.

¹³ Ndaa, waɗooɓe halleende ndo'ake, ɓe njani, ɓe ummitittaako.