Jabuura 31 - Fulfulde Bible

Jawmiraawo woni hisrude hooliiɓe mo

¹ Ngam kaliifaajo gime. Yimre Daawuda.

² Yaa Jawmiraawo, haa maaɗa nyukkiimi, taa accu mi semta sam! Hisnam, ngam a adiliijo!

³ Heɗitam, yaawɗa hisnugo yam! Laata tapaare hisnoore am, laata suudu semmbiɗndu haa kisanmi!

⁴ Ngam an woni tapaare suuɗirde am e suudu am semmbiɗndu. A ɗowatam, ngam daliila tedduŋgal innde ma.

⁵ A hisnatam tuuforgol ngol ɓe tuufnani yam, ngam an woni hisrude am.

⁶ Mi ɗon halfina ruuhu am nder juŋngo ma. A rimɗini yam, yaa Jawmiraawo, Allah gooŋgaajo.

⁷ Mi ɗon wanya tokkiiɓe labbi meereeji, ammaa mi ɗon hoolo Jawmiraawo.

⁸ Mi seyoto, mi welweltan daliila mbooɗeeŋga ma, ngam a laari bone am, a anndi caɗeele am.

⁹ A hokkaay yam haa juuɗe konneejo am, a darni kosɗe am dow nokkuure feeciinde.

¹⁰ Hinnam, yaa Jawmiraawo! Ngam mi ɓilliiɗo, gite am ɗon naawa ngam bojji am, ɓanndu am e yoŋki am fuu tampi.

¹¹ Suno siiɓi ngeendam am, uumaali usti duuɓi am. Mi tampuɗo ngam daliila aybe am, koo i'e am boo tampi.

¹² Konne'en am fuu ɗon njancammi, sakkomaa heeddiɗɗiraaɓe am. Annduɓe yam ɗon kultora daliila am. Yi'anɓe yam dow laawol ɗon ndoggammi.

¹³ Yimɓe fuu ngejjiti yam bana maayɗo, mi laati bana fayannde fusnde.

¹⁴ Mi ɗon nana ɗuuɗɓe ɗon nyo'ammi. Kultoreeŋgol ɗon taari yam! Ɓe ɗon carwootira dow am, ɓe ɗon kaɓɓa dabare mbarugo yam.

¹⁵ Ammaa min mi hoolake ma, yaa Jawmiraawo, mi wi'i: An woni Allah am!

¹⁶ Balɗe am fuu ɗon haa juŋngo ma, hisnam juuɗe konne'en am e toonyooɓe yam!

¹⁷ Laar jaggiiɗo ma bee yerduye! Hisnam fodde mbooɗeeŋga ma!

¹⁸ Mi ɗon toro ma, yaa Jawmiraawo, taa mi tosko. Toskin halluɓe ɓe'e, ngam haa ɓe njeeɗo, ɓe nasta joonde maayɓe!

¹⁹ Muukɗin fewooɓe ɓe'e, hallinanɓe adiliijo bee elewre e meeriɗinaare!

²⁰ Kay, mbooɗeeŋga ma ɗuuɗi! A resani ɗum hulɓe ma, a waɗani ɗum nyukkotooɓe haa maaɗa yeeso ɓiɓɓe Adaama fuu.

²¹ A suuɗan ɓe haa ngonɗa, ngam taa dabareeji yimɓe meema ɓe. A faddan ɓe ngam taa jokkirooɓe kuɗa ɓe.

²² Yettoore laatano Jawmiraawo! Ngam o waŋginani yam mbooɗeeŋga maako kaayeefiiwa, min gonnooɗo nder berniwol kippaaŋgol.

²³ Saa'i mi saklino, mi numno, a riiwi yam daayiiɗum, a yiɗaa yi'ugo yam. Ammaa a nani tornde am, nde mi wookani ma ngam ballal.

²⁴ Ngiɗe Jawmiraawo, onon hoolaaɓe maako! Jawmiraawo ɗon ayna gooŋga'en, ammaa o hiitoto mawnitiiɓe bee caatal.

²⁵ Cemmbiɗe, cuusɗine ɓerɗe mon, onon tammoriiɓe Jawmiraawo fuu!