Jabuura 30 - Fulfulde Bible

Yettoore ngam mo'ere Jawmiraawo

¹ Yimre Daawuda. Ngam cenki haykaliiru Allah.

² Mi ɗon maŋgte, yaa Jawmiraawo, ngam a ummini yam, a accaay konne'en am njalammi.

³ Yaa Jawmiraawo Allah am, mi wookani ma, an a yamɗitini yam.

⁴ Yaa Jawmiraawo, a wurtini yam joonde maayɓe, a yeeɗitini yam, a daayni yam bee nastanɓe ngaska.

⁵ Ngimane Jawmiraawo, onon hoolaaɓe maako! Maŋgte innde maako seniinde!

⁶ Ngam tikkere maako neeɓataa sam, ammaa mo'ere maako ɗon duura haa kaakaadi ngeendam fuu. Maŋngariba, bojji ngaɗan, ammaa fajiri, gookaali seyo.

⁷ Min, nde mi ɗonno jooɗi jam, saa'i man mbi'mi: “Mi dimmbataako sam.”

⁸ Yaa Jawmiraawo, bee mo'ere ma, a tabitini hooseere am. Ammaa saa'i a wiirni yam gite ma, mi hultori.

⁹ Mi wookani ma, yaa Jawmiraawo, yaa Allah am, mi tori ma ballal.

¹⁰ Mi wi'i: “Ko keɓata to mi maayi, to mi nasti ngaska lugguka? Laatiiɗo mbulwuldi maŋgtete na? O waawan anndingo gooŋgaaku ma na?

¹¹ Nanam, yaa Jawmiraawo! Yurminam, yaa Jawmiraawo! Laata balloowo yam!”

¹² A wartiri suno am gamol seyo, a ɓorti yam limce buhuuje, a ɓorni yam ngapaleewol seyo.

¹³ Ngam maajum mi yimante, mi jeeɗataako! Yaa Jawmiraawo, Allah am, mi maŋgtete haa foroy!