Jabuura 29 - Fulfulde Bible

Baawɗe sawtu Jawmiraawo

¹ Yimre Daawuda. Onon ɗowanteeɓe, teddine Jawmiraawo! Maŋgte tedduŋgal maako e baawɗe maako!

² Teddine innde Jawmiraawo! Cujidane mo saa'i o waŋginta senaare maako.

³ Sawtu Jawmiraawo ɗon iida dow ndiyamji, Allah tedduɗo ɗon telɓa bana felmaaŋgo, o ɗon dow ndiyamji ɗuuɗɗi.

⁴ Sawtu Jawmiraawo ɗon bee baawɗe, sawtu Jawmiraawo ɗon bee tedduŋgal.

⁵ Sawtu Jawmiraawo ɗon yewa leɗɗe cemmbiɗɗe, Jawmiraawo ɗon yewa leɗɗe cemmbiɗɗe haa hooseere Libanon.

⁶ O diwnan Libanon bana nyalbel, hooseere Hermoon boo bana mbana.

⁷ Sawtu Jawmiraawo ma'inan ma'e yiite.

⁸ Sawtu Jawmiraawo dimmbinan ladde hamaadaare, Jawmiraawo dimmbinan ladde hamaadaare Kaades.

⁹ Sawtu Jawmiraawo rimnan lelji, ɗoofdan leɗɗe laynde. Koo moy nder laamorde maako fuu, ɗon hoola: “Tedduŋgal laatano mo!”

¹⁰ Jawmiraawo ɗon jooɗi dow ilamji, Jawmiraawo woni laamiiɗo duumiiɗo.

¹¹ Jawmiraawo hokkan ummaatoore mum semmbe, Jawmiraawo barkiɗinan nde, o hokkan nde salaaman.