Jabuura 21 - Fulfulde Bible

Yettoore ngam jaalorgal laamiiɗo

¹ Ngam kaliifaajo gime. Yimre Daawuda.

² Yaa Jawmiraawo, laamiiɗo ɗon seyo ngam daliila semmbe ma. O ɗon seyo masin daliila kisndam ma.

³ A hokki mo ko ɓernde maako yiɗi, a salanaaki mo ko o tori ma.

⁴ A hokki mo barkaaji pantuɗi, a hippi mo woronnde kaŋŋeeri laaɓndi.

⁵ O tori ma ngeendam, a hokki mo ɗam. A juttini balɗe maako haa abada abadin.

⁶ Tedduŋgal maako mawni ngam daliila kisndam ma, a hokki mo maŋngu e daraja.

⁷ A barkiɗini mo haa foroy, a ɗon seyna mo ngam a ɗon wondi bee maako.

⁸ Laamiiɗo ɗon hoolo Jawmiraawo, o dimmbataako ngam daliila mbooɗeeŋga Ɓaŋiiɗo.

⁹ Juŋngo ma naŋngan konne'en ma fuu, nyaamo ma naŋngan wanyɓe ma.

¹⁰ Nyalaade nde a waŋgata, a laatinan ɓe bana yiite ɓolinirde. Jawmiraawo moɗan ɓe nder ɓernuki muuɗum. Yiite nyaaman ɓe.

¹¹ A nattinan ɓiɓɓe maɓɓe diga lesdi, a halkan danygol maɓɓe caka ɓiɓɓe Aadama.

¹² Koo to ɓe nufani ma kalluɗum, koo to ɓe kaɓɓi dabare dow maaɗa, ɓe mbaawataa wurnugo ɗum.

¹³ Ngam a lornan ɓe ɓaawo, a tiitinan kuri ma dow maɓɓe.

¹⁴ Umma, yaa Jawmiraawo, waŋgin semmbe ma! Minin min ngiman, min maŋgtan baawɗe ma.