Jabuura 20 - Fulfulde Bible

Do'aare ngam jaalorgal laamiiɗo

¹ Ngam kaliifaajo gime. Yimre Daawuda.

² Jawmiraawo jaabo tornde ma nder wakkati ɓillaare, Allah mo Yaakubu ayne!

³ O neldane ballal diga haykaliiru maako, o semmbiɗine diga hooseere Siyona!

⁴ O siftora dokke ma fuu, o yerda guleteeɗi ma boo!

⁵ O hokke ko ɓernde ma yiɗi, o hebbitina nufayeeje ma fuu!

⁶ Nden kam min ngooka daliila seyo, ngam jaalorgal ma. Min ɓaŋgtan tuutawal innde Allah meeɗen. Jawmiraawo jaabo torɗe ma fuu!

⁷ Jonta mi anndi Jawmiraawo woni kisnoowo laamiiɗo mo o suɓi, o jaaboto mo diga haykaliiru maako seniindu haa asamanji, o wallan mo bee nyaamo maako marŋgo baawɗe.

⁸ Woɗɓe ɗon koolo mootaaji pucci muuɗum'en, woɗɓe boo ɗon koolo pucci muuɗum'en. Ammaa enen, en ɗon koolo innde Allah Jawmiraawo meeɗen.

⁹ Kamɓe ɓe nyobboto, ɓe ndo'oto, ammaa enen, en ndaroto, en tabitan.

¹⁰ Yaa Jawmiraawo, hisnu laamiiɗo. Nyalaade min toroto ma, jaaba min!