Jabuura 17 - Fulfulde Bible

Tornde goɗɗo mo walaa aybe

¹ Do'aare Daawuda. Yaa Jawmiraawo, nan haala am adiliiha, heɗita gookaali am, jaɓ tornde nde toriimi bilaa naafikaare!

² Kiita maaɗa gooŋɗinammi, gite ma ngi'a gooŋgaaku!

^3-4 A linyi ɓernde am, jemma fuu a wari haa am, a foondi yam, a tawaay aybe. Mi wolwataa dow kuuɗe ɓiɓɓe Aadama. Mi ɗowtani bolle ma, mi tokkaaki laabi toonyooɓe.

⁵ Mi ɗon tabiti dow laawol ma, kosɗe am pergataako.

⁶ Mi ɗon ewno ma, ngam a nanatam, yaa Allah am. Waylitanam noppi ma, heɗita bolle am!

⁷ Waŋgin kuuɗe ma booɗɗe, kaayeefiije, yaa Kisnoowo! Nyaamo ma hisnan nyukkotooɓe haa ma diga juuɗe konne'en muuɗum'en.

⁸ Aynam bana aynirta ɓiŋngel yiitere ma! Suuɗam les bileeji ma!

⁹ Hisnam diga juuɗe halluɓe yiɗɓe halkugo yam, e juuɗe konne'en haaŋaaɓe taariiɓe yam!

¹⁰ Ɓe caatini ɓerɗe maɓɓe, kunnduɗe maɓɓe ɗon mbolwa bolle mawnitiiɗe.

¹¹ Ɓe taasni yam, ɓe taari yam, ɓe ɗon ɗaɓɓa wakkatiire fottannde ngam do'ugo yam.

¹² Ɓe nanndi bee mbarooga cuunaaŋga faɗɗugo huunde, bana mbarooga cemmbiɗŋga mbaaltiiŋga haa lowol maaga.

¹³ Umma, yaa Jawmiraawo, dartana konne'en am, do'u ɓe! Bee kaafahi ma, hisnam juuɗe halluɓe!

¹⁴ Bee juŋngo maaɗa, yaa Jawmiraawo, hisnam juuɗe yimɓe! Kamɓe ɓe keɓi ko ɓe ngiɗi fuu yaake ɓe ɗon haa duniyaaru. Hebbin deeɗi maɓɓe bee boneeji, ɗi ke'i haarnugo ɓiɓɓe maɓɓe boo, kamɓe boo ɓe accana ɓikkoy maɓɓe ko lutti.

¹⁵ Ammaa min mi adiliijo, mi yi'ete. To mi fini, mi seyoto ngam a waŋgantam.