Jabuura 16 - Fulfulde Bible

Tornde kooliiɗo Allah

¹ Yimre Daawuda. Aynam, yaa Allah, ngam mi nyukkake haa maaɗa.

² Mi ɗon wi'a Jawmiraawo: “An woni Jawmam, hayru am fuu iwi haa maaɗa.”

³ Senaaɓe Jawmiraawo nder lesdi ndi'i, ɓe tedduɓe, mi ɗon seyoro ɓe masin.

⁴ Ɗakkotirɓe bee ɗowanteeɓe jananɓe njaran boneeji ɗuuɗɗi, min mi rufantaa ɓe dokke ƴiiƴam, hunnduko am ewnataa inɗe maɓɓe sam.

⁵ Yaa Jawmiraawo, an woni geɗal am e maral am, a ɗon tabitina hayru am.

⁶ Maral ngal keɓmi wooɗi masin, ngal ɗon fottanammi.

⁷ Mi ɗon maŋgta Jawmiraawo ɗowoowo yam, jemmaaje fuu ɓernde am ɗon reentinammi.

⁸ Gite am ɗon tiiti Jawmiraawo tum, nde nii o ɗon dari haa nyaamo am, mi dimmbataako.

⁹ Ngam maajum ɓernde am ɗon seyo, nafsu am ɗon welwelta, ɓanndu am boo ɗon jooɗi nder de'ere.

¹⁰ Ngam a accataa yoŋki am haa joonde maayɓe, a accataa kooliiɗo ma nyola nder ngaska lugguka.

¹¹ A sappintam laawol ngeendam, seyo ɗuuɗŋgo ɗon haa yeeso ma, welwelooji duumiiɗi ɗon haa juŋngo ma.