Jabuura 148 - Fulfulde Bible

Asama e lesdi maŋgta Jawmiraawo

¹ Halleluya! Maŋgte Jawmiraawo haa asamanji! Maŋgte mo nder ɓaŋgiiɗum!

² Maŋgte mo, onon malaa'ika'en maako! Maŋgte mo, onon honooɓe maako ɓe asama!

³ Maŋgte mo, onon naaŋge e lewru! Maŋgte mo, onon koode jaynanɗe!

⁴ Maŋgte mo, onon asamanji ɓurɗi towugo e ndiyamji gonɗi dow asamanji!

⁵ Ɗi fuu ɗi maŋgta innde Jawmiraawo, ngam o tagi ɗi bee umroore maako.

⁶ O tabitini ɗi haa abada abadin, ɗi luutataa umroore maako sam.

⁷ Maŋgte Jawmiraawo haa lesdi, onon ndiyamji lugguɗi fuu e kuuje kulniiɗe nder beeli,

⁸ ma'e e mallimallooje e ndiyamji ɗi peewol saatini e duule, keni caatuɗi baɗooji muuyo maako,

⁹ kooseeje e towndiije fuu, leɗɗe dimooje ɓiɓɓe e leɗɗe cemmbiɗɗe fuu,

¹⁰ kuuje ladde e dabbaaji saare fuu, ladooji e colli!

¹¹ Maŋgte mo, onon laamiiɓe nder duniyaaru e ummaatooje fuu, mawɓe e ardiiɓe nder duniyaaru fuu,

¹² suka'en e faanyɓe rewɓe, ndotti'en e derke'en!

¹³ Ɓe fuu ɓe maŋgta innde Jawmiraawo! Ngam innde maako ɓuri inɗe fuu mawnugo, daraja maako ɓuri asama e lesdi.

¹⁴ O hokki ummaatoore maako baawɗe. Ngam maajum hoolaaɓe maako fuu maŋgtan mo. O semmbiɗini Isra'iila, ummaatoore ɓadiinde mo. Halleluya!