Jabuura 146 - Fulfulde Bible

Barka laatanto hoolotooɓe Jawmiraawo

¹ Halleluya! Sey mi maŋgta Jawmiraawo!

² Sey mi maŋgta mo balɗe am fuu, mi yimana Allah am yaake mi ɗon yeeɗa!

³ Taa koole mawɓe, taa koole ɓiɓɓe Aadama ɓe mbaawataa hisnugo on.

⁴ To ɓe maayi, ɓe loroto haa mbulwuldi. Nyalaade man dabareeji maɓɓe njinnan.

⁵ Barka laatanto goɗɗo mo Allah Yaakubu wallata ɗum, mo tammorto Jawmiraawo Allah mum.

⁶ Kaŋko tagi asamanji e lesdi, non boo mbeela e ko woni nder maaga fuu. Kaŋko o koolniiɗo foroy.

⁷ O waɗanan toonyiiɓe kiita ngooŋɗuka. O hokkan dolɓe nyaamdu. Jawmiraawo rimɗinan haɓɓaaɓe,

⁸ Jawmiraawo wumtinan wumɓe. Jawmiraawo ummitinan toskaaɓe. Jawmiraawo yiɗi adili'en.

⁹ Jawmiraawo aynan jananɓe, o wallan atiime'en e rewɓe yurumɓe. Ammaa o yibbinan dabareeji halluɓe.

¹⁰ Jawmiraawo woni laamiiɗo haa foroy. An Siyona, Allah maaɗa laamoto diga yidere haa yidere. Halleluya!