Jabuura 145 - Fulfulde Bible

Maŋngu Jawmiraawo e mbooɗeeŋga mum

¹ Yimre Daawuda maŋgtoore. Mi maŋgtete, yaa Allah am, Laamiiɗo! Mi teddinan innde ma haa abada abadin!

² Mi yettete nyalɗe fuu! Mi maŋgtan innde ma haa abada abadin!

³ Jawmiraawo o mawɗo, o he'i maŋgtooje ɗuuɗɗe, maŋngu maako walaa keerol!

⁴ Diga yidere haa yidere yimɓe manan kuuɗe ma, ɓe ngeynan kuuɗe ma mawɗe.

⁵ Mi numtan tedduŋgal ma e daraja ma e maŋngu ma e haala kaayeefiiji ma.

⁶ Ɓe mbolwan haala kuuɗe ma mawɗe kulniiɗe, min boo mi yeccan haala maŋngu ma.

⁷ Ɓe ciftinoran mbooɗeeŋga ma ɗuuɗŋga, ɓe ngiman bee seyo daliila adilaaku ma.

⁸ Jawmiraawo woni marɗo enɗam e hinnuye, mo tikkataa law, mo mbooɗeeŋga mum ɗuuɗi.

⁹ Jawmiraawo ɗon woonana koo moy, o ɗon enɗa tagle maako fuu.

¹⁰ Tagle ma fuu ngettete, yaa Jawmiraawo, hoolaaɓe ma maŋgtete.

¹¹ Ɓe ngeynan tedduŋgal laamu ma, ɓe mbolwan haala baawɗe ma,

¹² ngam anndingo ɓiɓɓe Aadama kuuɗe baawɗe ma e tedduŋgal maŋngal ngal laamu ma.

¹³ Laamu ma ɗum laamu nduumiiŋgu, laamu ma tabitan diga yidere haa yidere. Jawmiraawo o koolniiɗo nder bolle maako fuu, o booɗɗo nder kuuɗe maako fuu.

¹⁴ Jawmiraawo wallan do'iiɓe fuu, o ummitinan toskaaɓe.

¹⁵ Tagle fuu ɗon ndaara gal maaɗa, haa a hokka ɗe nyaamdu nder wakkati haaje.

¹⁶ A weeɗan juŋngo maaɗa, a hiɓɓinan haaje tagle fuu.

¹⁷ Jawmiraawo o adiliijo nder kuuɗe mum fuu, o koolniiɗo nder maaje.

¹⁸ Jawmiraawo o ɓadiiɗo ewnotooɓe mo, ewnotooɓe mo bee ɓernde woore.

¹⁹ O hiɓɓinan haaje hulɓe mo, o nanan gookaali maɓɓe, o hisnan ɓe.

²⁰ Jawmiraawo aynan yiɗɓe mo fuu, ammaa o nattinan halluɓe fuu.

²¹ Sey hunnduko am maŋgta Jawmiraawo, tagle fuu maŋgta innde maako seniinde haa abada abadin!