Jabuura 143 - Fulfulde Bible

Tornde ngam ballal

¹ Yimre Daawuda. Yaa Jawmiraawo, nan do'a am, jaɓ tornde am! Jaabam fodde adilaaku ma e gooŋgaaku ma.

² Taa yahru maccuɗo ma haa kiita ma, ngam walaa geeto adiliijo koo gooto yeeso ma.

³ Konneejo am taasni yam, dammi yam haa lesdi, nastini yam nder nyiɓre, mi laati bana maayɓe diga ɓooyma.

⁴ Ruuhu am tampi, mi saklake masin.

⁵ Mi ɗon siftora nyalɗe caaliiɗe, mi ɗon numta kuuɗe ma fuu mi ɗon numta ko juuɗe ma mbaɗi.

⁶ Mi ɗon weeɗa juuɗe am heedi maaɗa, mi laati bana lesdi njoorndi yeeso maaɗa.

⁷ Jaabam law, yaa Jawmiraawo! Ruuhu am ɗon jinna! Taa wiirnam gite ma! Ngam taa mi laato bana nastanɓe ngaska lugguka.

⁸ Wolwanam haala mbooɗeeŋga ma to weeti, ngam mi hoolake ma. Anndinam laawol ngol ngiɗɗa mi tokko ɗum, ngam mi halfitini ma yoŋki am.

⁹ Yaa Jawmiraawo, mi ɗon nyukko haa maaɗa, hisnam e konne'en am!

¹⁰ An woni Allah am, ekkitinam waɗugo muuyo ma, Ruuhu ma woonanammi, ɗowammi dow laawol darnuŋgol!

¹¹ Hisnu yoŋki am daliila innde ma, yaa Jawmiraawo! Wurtinam ɓillaare, daliila adilaaku ma!

¹² Ngam daliila mbooɗeeŋga ma, nattin konne'en am! Halku wanywanyɓe yam fuu, ngam mi maccuɗo ma!