Jabuura 142 - Fulfulde Bible

Tornde goɗɗo mo walaa ballal

¹ Yimre Daawuda ekkitinoore. Saa'i o ɗonno nder lowol, o waɗi do'aare nde'e.

² Mi ɗon wookana Jawmiraawo, mi ɗon toro mo bee sawtu haa o hinnammi.

³ Mi ɗon siŋka yeeso maako, mi ɗon limtana mo ɓillaaje am.

⁴ To ruuhu am tampi, an a anndi haa njahanmi. Dow laawol ngol njahanmi, ɓe tuufani yam tuuforgol.

⁵ Laar gal nyaamo am, walaa ballanɗo yam. Hisrude fuu daayi yam, walaa kakkilananɗo yoŋki am.

⁶ Yaa Jawmiraawo, mi ɗon wookane. An woni hisrude am, an woni geɗal am nder lesdi yeeɗɓe.

⁷ Heɗita wookaandu am, ngam mi toskiiɗo masin! Hisnam diga taasnooɓe yam, ngam ɓe ɓuri yam semmbe!

⁸ Wurtinam diga kaɓɓirgal ɓillaare, haa mi maŋgta innde ma! Adili'en taaroto yam to a woonani yam.