Jabuura 141 - Fulfulde Bible

Do'aare kiikiiɗe

¹ Yimre Daawuda. Yaa Jawmiraawo, mi ɗon toro ma, yaawɗa wallugo yam! Heɗitam saa'i mi ɗon ewno ma!

² Tornde am laato bana uurle uurooje yeeso ma, juuɗe am ɓaŋgtaaɗe boo bana dokkal nyaamdu kiikiiɗe.

³ Yaa Jawmiraawo, hakkilan hunnduko am, ngam taa mi wolwa ko fottaay.

⁴ Aynam ngam taa mi ɗaɓɓa kalluɗum! Taa mi hawta bee waɗooɓe zunuuba, mi waɗa ko haanaay, taa mi metto dakamji maɓɓe!

⁵ Mo'ere ngam am to adiliijo elti yam, to o feli yam, ɗum ɗon bana nebbam dow hoore am, mi salataako ɗam. Ammaa nder do'aaje am kaɓanmi foroy bee halleende halluɓe.

⁶ To ardiiɓe maɓɓe ndo'aama diga tapaaje towɗe, nden kam yimɓe ngooŋɗinan bolle am belɗe.

⁷ Bana to goɗɗo remi ngesa, seeki lesdi, bana non i'e amin caŋkititto haa nastirde joonde maayɓe.

⁸ Ammaa min mi ɗon tijjo gal maaɗa, yaa Jawmiraawo Allah. Haa maaɗa nyukkotoomi, taa accu mi maaya!

⁹ Aynam diga tuuforgol ngol ɓe tuufani yam, aynam diga tuuforli waɗooɓe halleende.

¹⁰ Accu halluɓe ndo'o nder gasɗe muuɗum'en, min kam mi hisa!