Jabuura 140 - Fulfulde Bible

Hisnam juuɗe toonyooɓe yam

¹ Ngam kaliifaajo gime. Yimre Daawuda.

² Yaa Jawmiraawo, hisnam juuɗe halluɓe, aynam e toonyooɓe!

³ Ɓerɗe maɓɓe ɗon nufo kalluɗum, nyalɗe fuu ɓe ɗon ummina haɓre.

⁴ Ɗemɗe maɓɓe nanndi bee boɗɗe mbarooje, bolle maɓɓe laati bana tooke foosokre.

⁵ Yaa Jawmiraawo, aynam e juuɗe halluɓe! Aynam e toonyooɓe nufotooɓe no ɓe ndo'irammi!

⁶ Mawnitiiɓe tuufani yam tuuforli feere feereeji, koo toy haa laawol am ngam naŋngugo yam.

⁷ Mi wi'i Jawmiraawo: “An woni Allah am.” Nan tornde am, yaa Jawmiraawo!

⁸ An woni kisnoowo yam cemmbiɗɗo, yaa Allah Jawmiraawo am, a ayni yam nyalaade haɓre.

⁹ Taa hokku halluɓe ko ɓe ɗaɓɓata, yaa Jawmiraawo, haɗ dabareeji maɓɓe hawtugo ngam taa ɓe mawnito!

¹⁰ Sarru ngu taariiɓe yam mbolwi, loro dow ko'e maɓɓe!

¹¹ Toɓnu ƴulɓe yiite dow maɓɓe! Ɓe nguba ɓe nder ngaska lugguka, taa ɓe keɓa wurtaago ka!

¹² Taa waɗooɓe tufle tabita nder lesdi! Sarru taasna toonyooɓe bilaa siwtaare!

¹³ Yaa Jawmiraawo, mi anndi a ɗon gooŋɗina laafuɓe, a ɗon tabitina gooŋga ɓilliiɓe.

¹⁴ Adili'en maŋgtan innde ma, gooŋga'en njooɗoto yeeso maaɗa.