Jabuura 138 - Fulfulde Bible

Yettoore Jawmiraawo ngam mbooɗeeŋga e gooŋgaaku mum

¹ Yimre Daawuda. Mi ɗon yette bee ɓernde am fuu, mi ɗon yima maŋgtoore ma yeeso ɗowanteeɓe.

² Mi ɗon sujida yeeso haykaliiru ma seniindu haa mi maŋgta innde ma ngam daliila mbooɗeeŋga e gooŋgaaku ma, ngam a hebbitini iinaaji ma ko ɓuri tammunde amin.

³ Saa'i mi ewni ma, a jaabi yam, a semmbiɗini yoŋki am masin.

⁴ Yaa Jawmiraawo, laamiiɓe duniyaaru fuu ngettete, to ɓe nani bolle maaɗa!

⁵ Ɓe ngima maŋgtoore kuuɗe Jawmiraawo, ngam tedduŋgal maako ɗuuɗŋgal.

⁶ Koo nde Jawmiraawo o Ɓaŋiiɗo, o ɗon laara leesɓe, ammaa o ɗon anndita mawnitiiɓe diga daayiiɗum.

⁷ Koo to ɓillaaje taarake yam, an a ɗon ayna yoŋki am. A fortan juŋngo ma dow konne'en am tikkananɓe yam, nyaamo ma hisnatam.

⁸ A timminan haala am jam, yaa Jawmiraawo, mbooɗeeŋga ma ɗon tabiti haa foroy. Taa wudin tagaaɓe maaɗa!