Jabuura 136 - Fulfulde Bible

Ngette Jawmiraawo ngam mbooɗeeŋga mum

¹ Ngette Jawmiraawo, ngam o booɗɗo – mbooɗeeŋga maako ɗon haa abada.

² Ngette Allah Mawɗo – mbooɗeeŋga maako ɗon haa abada.

³ Ngette Jawmiraawo jawmiraaɓe – mbooɗeeŋga maako ɗon haa abada.

⁴ Kaŋko feere maako ɗon waɗa kaayeefiiji mawɗi – mbooɗeeŋga maako ɗon haa abada.

⁵ O tagi asamanji bee hikma – mbooɗeeŋga maako ɗon haa abada.

⁶ O we'iti lesdi dow ndiyamji – mbooɗeeŋga maako ɗon haa abada.

⁷ O waɗi jayli mawɗi – mbooɗeeŋga maako ɗon haa abada.

⁸ naaŋge ngam laamanaago nyalawma – mbooɗeeŋga maako ɗon haa abada –

⁹ lewru e koode boo ngam laamanaago jemma – mbooɗeeŋga maako ɗon haa abada.

¹⁰ O mbari ɓiɓɓe Misra'en afɓe – mbooɗeeŋga maako ɗon haa abada.

¹¹ O wurtini yimɓe Isra'iila diga Misra – mbooɗeeŋga maako ɗon haa abada –

¹² bee juŋngo maako semmbiɗŋgo – mbooɗeeŋga maako ɗon haa abada.

¹³ O senndi maayo Maaliya geɓe ɗiɗi – mbooɗeeŋga maako ɗon haa abada.

¹⁴ O eerni yimɓe Isra'iila haa caka maago – mbooɗeeŋga maako ɗon haa abada.

¹⁵ O majjini Firawna e mooɓre honooɓe mum nder maago – mbooɗeeŋga maako ɗon haa abada.

¹⁶ O ɗowi ummaatoore maako nder ladde – mbooɗeeŋga maako ɗon haa abada.

¹⁷ O mbari laamiiɓe mawɓe – mbooɗeeŋga maako ɗon haa abada,

¹⁸ o mbari laamiiɓe tedduɓe – mbooɗeeŋga maako ɗon haa abada,

¹⁹ Sihon, laamiiɗo Amoori'en – mbooɗeeŋga maako ɗon haa abada,

²⁰ e Ook, laamiiɗo Baasan – mbooɗeeŋga maako ɗon haa abada.

²¹ O hokki lesɗe maɓɓe haa ummaatoore maako – mbooɗeeŋga maako ɗon haa abada,

²² ɗe laati maral Isra'iila'en jagganooɓe mo – mbooɗeeŋga maako ɗon haa abada.

²³ O yejjitaay en saa'i en toskaaɓe – mbooɗeeŋga maako ɗon haa abada.

²⁴ O hisni en juuɗe konne'en men – mbooɗeeŋga maako ɗon haa abada.

²⁵ O ɗon nyaamna tagefooji fuu – mbooɗeeŋga maako ɗon haa abada.

²⁶ Ngette Allah mo asama – mbooɗeeŋga maako ɗon haa abada.