Jabuura 121 - Fulfulde Bible

Jawmiraawo woni aynoowo ma

¹ Yimre jahaaŋgal haa Urusaliima. Mi ɗon tijjo gal kooseeje. Haa toy ballal am iwata?

² Ballal am ɗon iwa haa Jawmiraawo, tagɗo asamanji e lesdi.

³ O accataa kosŋgal ma dimmbo. Kaŋko woni aynoowo ma, o ɗaanataako.

⁴ Fakat, aynoowo Isra'iila ngoŋngataa, ɗaanataako sam.

⁵ Jawmiraawo woni aynoowo ma, Jawmiraawo ɗon dari haa nyaamo ma, o suddete bee ɗowdi maako.

⁶ Nyalawma naaŋge torrataa ma, jemma boo lewru nyawnataa ma.

⁷ Jawmiraawo aynete diga sarru fuu, o aynan yoŋki ma.

⁸ Koo a ɗon wara, koo a ɗon dilla, Jawmiraawo ɗon ayne diga jonta haa foroy.