Jabuura 12 - Fulfulde Bible

Bolle Jawmiraawo laaɓɗe e bolle halluɓe rikiciije

¹ Ngam kaliifaajo gime bee moolooji marɗi ɓoggi joweetati. Yimre Daawuda.

² Hisnam, yaa Jawmiraawo, ngam hoolaaɓe njinni, gooŋga'en tawataake caka ɓiɓɓe Aadama.

³ Yimɓe ɗon pewindira, ɓe ɗon mbolwindira bolle rikiciije, koo moy fuu bee ɓerɗe ɗiɗi.

⁴ Yaa Jawmiraawo, ta'u ɗemɗe maɓɓe naafikiije e kunnduɗe maɓɓe ƴaggiiɗe.

⁵ Ɓe ɗon mbi'a: “Min mbolwan ko min ngiɗi, walaa mo haɗata min. Moy mari min?”

⁶ Jawmiraawo wi'i: “Jonta kam mi ummoto, ngam ɓe ɗon toonyo laafuɓe, talaka'en ɗon uumo. Yenwuɓe kisndam am, mi hisnan ɓe.”

⁷ Bolle Jawmiraawo, ɗe laaɓɗe bana cardi laaɓndi, ɓolinaandi nde joweeɗiɗi nder ɓolinirde.

⁸ Yaa Jawmiraawo, an a aynan laafuɓe, a hisnan min diga yidere hallunde nde'e ngam foroy.

⁹ Halluɓe ɗon ngaanca koo toy, halleende ɗuuɗi caka ɓiɓɓe Aadama.