Jabuura 118 - Fulfulde Bible

Ngette Jawmiraawo ngam mbooɗeeŋga maako

¹ Ngette Jawmiraawo, ngam o booɗɗo, mbooɗeeŋga maako ɗon haa abada!

² Sey yimɓe Isra'iila mbi'a: “Mbooɗeeŋga maako ɗon haa abada!”

³ Sey yimɓe danygol Haruna mbi'a: “Mbooɗeeŋga maako ɗon haa abada!”

⁴ Sey hulɓe Jawmiraawo fuu mbi'a: “Mbooɗeeŋga maako ɗon haa abada!”

⁵ Nder ɓillaare am toriimi Jawmiraawo, kaŋko o jaabi yam, o wurtini yam diga maare.

⁶ Jawmiraawo ɗon wondi bee am, mi hulataa koo ɗume. Ɗume yimɓe mbaawata waɗugo yam?

⁷ Jawmiraawo woni balloowo yam, mi yi'an do'ere konne'en am.

⁸ Nyukkaago haa Jawmiraawo ɓuri hoolaago yimɓe,

⁹ nyukkaago haa Jawmiraawo ɓuri hoolaago mawɓe.

¹⁰ Ummaatooje fuu taari yam, mi halki ɓe fuu bee innde Jawmiraawo.

¹¹ Ɓe taari yam koo toy fuu, mi halki ɓe bee innde Jawmiraawo!

¹² Ɓe taari yam bana nyaaki, ɓe nyifi bana gi'e joorɗe kuɓɓaaɗe, mi halki ɓe bee innde Jawmiraawo!

¹³ Ɓe ngerɓi yam bee semmbe ngam haa mi do'o, ammaa Jawmiraawo walli yam.

¹⁴ Jawmiraawo woni semmbe am e daliila yimre am, kaŋko hisni yam.

¹⁵ Gookaali seyo e jaalorgal ɗon nder laymaaji adili'en: “Nyaamo Jawmiraawo huuwani en kuuɗe mawɗe.

¹⁶ Nyaamo maako ɓaŋgake, nyaamo maako huuwani en kuuɗe mawɗe.”

¹⁷ Mi maayataa, ammaa mi yeeɗan, mi anndinan yimɓe ko Jawmiraawo waɗi.

¹⁸ Jawmiraawo ɓocci yam bee caatal, ammaa o hokkaay yam haa juŋngo waade.

¹⁹ Maɓɓitaneeɗam dammuɗe adili'en, mi nasta, ngam haa mi yetta Jawmiraawo!

²⁰ Ndaa dammugal Jawmiraawo! Ton adili'en nastirta.

²¹ Mi ɗon yette ngam a jaabi yam, a hisni yam boo.

²² Hayre nde mahooɓe ngudini, laati hayre talkumoore ɓurnde saman.

²³ Jawmiraawo waɗi ɗum, ɗum kaayeefi haa gite men.

²⁴ Hannde woni nyalaade nde Jawmiraawo waɗi. Mbelmbelte! Ceyoren nde!

²⁵ Yaa Jawmiraawo, hisnu min! Useni, Jawmiraawo, hokku min jaalorgal!

²⁶ Barka laatano garanɗo bee innde Jawmiraawo! Diga haykaliiru Jawmiraawo, min mbarkiɗinan on.

²⁷ Jawmiraawo woni Allah, o yaynani en. Nyannde juulde mon njoge lice, kawte, njehe haa njotton luwe hirsirde.

²⁸ An woni Allah am, mi yettete! Yaa Allah am, mi maŋgtete!

²⁹ Ngette Jawmiraawo, ngam o booɗɗo, mbooɗeeŋga maako ɗon haa abada.