Jabuura 113 - Fulfulde Bible

Maŋgtoore Allah teddinanɗo laafuɗo

¹ Halleluya! Onon jagganooɓe Jawmiraawo, maŋgte innde maako!

² Maŋgtoore laatano innde Jawmiraawo diga jonta haa foroy!

³ Maŋgtoore laatano innde Jawmiraawo diga fuɗirde naaŋge haa mutirde maage!

⁴ Jawmiraawo ɗon laamano ummaatooje fuu, tedduŋgal maako ɓuri asamanji mawnugo.

⁵ Moy nanndi bee Allah Jawmiraawo men? O ɗon jooɗi haa ɓaŋgiiɗum,

⁶ ammaa o ɗon leesna hoore maako ngam laarugo asama e lesdi fuu.

⁷ O umminan laafuɓe diga mbulwuldi, o hoocan talaka'en diga jiddere, o ɓaŋgtan ɓe.

⁸ O jo'inan ɓe kommbi tedduɓe, kommbi mawɓe ummaatoore maako.

⁹ O jo'inan dimaro boo nder saare mum, o seynan mo bee hokkugo mo ɓikkoy. Halleluya!