Jabuura 111 - Fulfulde Bible

Yettugo Jawmiraawo ngam kuuɗe mum kaayiifiije

¹ Halleluya! Mi yettan Jawmiraawo bee ɓernde am fuu nder dawriinde gooŋga'en e mooɓtorde yimɓe maako.

² Kuuɗe Jawmiraawo, ɗe mawɗe. Seyoriiɓe ɗe fuu numta ɗe.

³ Ko o waɗata heewi maŋngu e daraja. Adilaaku maako ɗon tabiti haa foroy.

⁴ Jawmiraawo siftinori en kaayeefiiji mum, o marɗo enɗam e hinnuye.

⁵ O ɗon hokka hulɓe mo nyaamdu, o yejjitittaa alkawal maako sam.

⁶ O waŋginani ummaatoore maako baawɗe maako nder kuuɗe maako bee hokkugo nde lesdi ummaatooje goɗɗe.

⁷ O ɗon waɗa koo ɗume fuu bee gooŋgaaku e kiita ndarnuka, sarɗiiji maako fuu ɗi koolniiɗi.

⁸ Ɗi ɗon tabiti haa abada abadin, ɗi gooŋɗuɗi, ɗi ɗon ndari dow gooŋgaaku.

⁹ O neldi ummaatoore maako kisndam, o tabitini alkawal maako duumiiŋgal bee maɓɓe. Innde maako seniinde e hulniinde!

¹⁰ Kulol Jawmiraawo woni fuɗɗam hikma, koo moy tokki ɗum, heɓan hakkiilo wooɗŋgo. Maŋgtoore Jawmiraawo duuran haa foroy!