Jabuura 11 - Fulfulde Bible

Jawmiraawo woni hisrude adiliijo

¹ Ngam kaliifaajo gime. Yimre Daawuda. Jawmiraawo woni nyukkorde am. Koni mbi'oton yam: “Doggu haa kooseeje bana sonndu!

² Ndaa halluɓe tiri lagaaje muuɗum'en, njo'ini kuri dow jiriiji, cuuɗi nder nyiɓre ngam fiɗugo gooŋɗa-ɓerɗe'en.

³ To hoolaare e gooŋgaaku mbirgaama, ɗume adiliijo waawata waɗugo?”

⁴ Jawmiraawo ɗon nder haykaliiru mum seniindu, leeso laamu Jawmiraawo ɗon haa asama. Gite maako ɗon ndaara, ɗon linya kuuɗe ɓiɓɓe Aadama.

⁵ Jawmiraawo ɗon linya ɓerɗe adili'en e halluɓe fuu, ɓernde maako ɗon wanya yiɗɓe toonyaare.

⁶ O rufan ƴulɓe yiite e baruudu dow halluɓe, o neldan henndu wulndu jaw dow maɓɓe, kanjum woni geɗal maɓɓe.

⁷ Ngam Jawmiraawo o adiliijo, o yiɗi kuuɗe adiliije, gooŋɗa ɓerɗe'en ngi'oyan mo.