Jabuura 107 - Fulfulde Bible

Yeɓre jowaɓre ( Jabuura 107—150 ) Yettoore haa Jawmiraawo kisnoowo yimɓe diga caɗeele

¹ Ngette Jawmiraawo, ngam o booɗɗo, mbooɗeeŋga maako ɗon haa abada!

² Sey yimɓe ɓe Jawmiraawo rimɗini, ɓe o hisni diga juuɗe konneejo, ngetta mo!

³ O mooɓti ɓe diga lesɗe fuunaaŋge e hiirnaaŋge e woyla e fombina.

⁴ Woɗɓe maɓɓe ngiili nder ladde, haa harde, tawaay laawol berniwol, haa yimɓe ɗon njooɗi.

⁵ Dolo e ɗomka torri ɓe, haa ɓe tampi.

⁶ Nder ɓillaare maɓɓe ɓe ngookani Jawmiraawo, kaŋko o hisni ɓe caɗeele maɓɓe.

⁷ O ɗowi ɓe dow laawol darnuŋgol, haa ɓe njotti berniwol, haa yimɓe ɗon njooɗi.

⁸ Sey ɓe ngetta Jawmiraawo ngam mbooɗeeŋga mum e kaayeefiiji ɗi o waɗani ɓiɓɓe Aadama.

⁹ Ngam o ɗomɗitini ɗomɗuɓe, o haarni dolɓe bee kuuje booɗɗe.

¹⁰ Woɗɓe maɓɓe ɗonno njooɗi nder nyiɓre nyiɓɓunde, ɓe toskaaɓe, haɓɓaaɓe bee callalluuji,

¹¹ ngam ɓe tuurtani umrooje Allah, ɓe njawi wasuyeeji Ɓaŋiiɗo.

¹² O leesni ɓe bee bone, ɓe ɗon liilta, walaa jogoowo ɓe.

¹³ Nder ɓillaare maɓɓe ɓe ngookani Jawmiraawo, kaŋko o hisni ɓe caɗeele maɓɓe.

¹⁴ O wurtini ɓe nyiɓre nyiɓɓunde, o ta'i kaɓɓorli maɓɓe.

¹⁵ Sey ɓe ngetta Jawmiraawo ngam mbooɗeeŋga mum e kaayeefiiji ɗi o waɗani ɓiɓɓe Aadama.

¹⁶ Kaŋko o yewi pareeje njamndi mboɗeeri, o yewi jamɗe palduɗe boo.

¹⁷ Faataaɓe njari bone daliila tuurtol e aybeeji muuɗum'en.

¹⁸ Nyaamdu welanaay ɓe sam, ɓe njotti daande maayde.

¹⁹ Nder ɓillaare maɓɓe ɓe ngookani Jawmiraawo, kaŋko o hisni ɓe caɗeele maɓɓe.

²⁰ O neldi ɓe wolde maako, hurgi ɓe, o hisni ɓe maayugo.

²¹ Sey ɓe ngetta Jawmiraawo ngam mbooɗeeŋga mum, e kaayeefiiji ɗi o waɗani ɓiɓɓe Aadama.

²² Ɓe lii'o kirseteeɗi ngam maŋgtugo Allah, ɓe ngooka daliila seyo, ɓe limta kuuɗe maako.

²³ Woɗɓe maɓɓe njehi dow mbeela bee koommbooje, mbaɗi filu dow maaga.

²⁴ Ɓe ngi'i kuuɗe Jawmiraawo nder mbeela, e kaayeefiiji ɗi o waɗi nder luggeeŋga ndiyam.

²⁵ O umri henndu saatundu ummo, ummina ƴuuge.

²⁶ Ƴuuge man ɓaŋgti ɓe haa dow, lorni ɓe fahin nder lugguɗum, ɓe kultori ngam ɓillaare man.

²⁷ Ɓe liilti bana wuykuɓe, hakkiilooji maɓɓe fuu itti.

²⁸ Nder ɓillaare maɓɓe ɓe ngookani Jawmiraawo, kaŋko o hisni ɓe caɗeele maɓɓe.

²⁹ O de'itini henndu saatundu, ƴuuge mbeela nde'iti.

³⁰ Ɓe ceyori de'ere man, o yahri ɓe jam haa jipporde nde ɓe ngeli.

³¹ Sey ɓe ngetta Jawmiraawo ngam mbooɗeeŋga mum e kaayeefiiji ɗi o waɗani ɓiɓɓe Aadama.

³² Ɓe anndina maŋngu maako nder mooɓtorde yimɓe, ɓe maŋgta mo nder kawtal ndotti'en.

³³ Jawmiraawo laatini maaje ladde, wartiri ceeɓooje boo lesdi njoorndi.

³⁴ O wartiri lesdi mboondi ngoolirde, ngam daliila halleende jooɗiiɓe ton.

³⁵ O laatini ladde boo weendu, lesdi njoorndi boo warti ceeɓooje.

³⁶ O jo'ini dolɓe ton, ɓe nyiɓi berniwol ngam ɓe njooɗo.

³⁷ Ɓe aawi gese, ɓe njubi inabooje, ɗe ndimi ɓiɓɓe ɗuuɗɗe.

³⁸ O barkiɗini ɓe, ɓe keɓi ɓikkoy ɗuuɗkoy masin, o ustaay dabbaaji maɓɓe.

³⁹ Saa'i limgal yimɓe Allah usti, ɓe toskaama, daliila toonyaaŋgeeji e sarruuji e torraaji,

⁴⁰ o yawni mawɓe ɓillooɓe ɓe, o yiilni ɓe nder ladde sookre nde walaa laawol.

⁴¹ Ammaa o hisni ɓe toskaare, o ɗuɗɗini ci'e maɓɓe bana tokke.

⁴² Gooŋga'en ngi'an ɗum, ceyoto, ammaa halluɓe fuu cirwoto.

⁴³ To goɗɗo woodi hikma, sey o hakkilana ɗum, o faama kuuɗe Jawmiraawo booɗɗe!