Jabuura 106 - Fulfulde Bible

Sooynde adilaaku Isra'iila e adilaaku Allah

¹ Halleluya! Ngette Jawmiraawo, ngam o booɗɗo, mbooɗeeŋga maako ɗon haa abada.

² Moy waawata anndingo kuuɗe Jawmiraawo mawɗe e yeeynugo maŋgtooje maako fuu?

³ Barka laatanto gooŋga'en, waɗooɓe adilaaku tum.

⁴ Siftoram nder mo'ere ma ngam ummaatoore ma, yaa Jawmiraawo, yiidam, an kisnoowo yam!

⁵ Accu mi yi'a hayru suɓaaɓe ma, mi seyoro seyo ummaatoore ma, mi manto hawtaade bee yimɓe ɓe marɗa!

⁶ Min mbaɗi hakke bana kaakiraaɓe amin, min mbaɗi ko halli, min aybuɓe.

⁷ Kaakiraaɓe amin haa Misra paamaay kaayeefiiji ma, ɓe ciftoraay kuuɗe ma booɗɗe ɗuuɗɗe, ɓe tuurtani ma haa maayo Maaliya.

⁸ Ammaa Jawmiraawo walli ɓe, ngam daliila innde muuɗum, ngam waŋgingo baawɗe muuɗum.

⁹ O telɓani maayo Maaliya, ngo ɓeeɓi, o eerni yimɓe maako nder lugguɗum maayo bana dow lesdi njoorndi.

¹⁰ O hisni ɓe juuɗe wanyɓe ɓe, o rimɗini ɓe juuɗe konne'en maɓɓe.

¹¹ Ndiyam suddi toonyotooɓe ɓe. walaa koo gooto maɓɓe hisi.

¹² Nden yimɓe maako nuɗɗini bolle maako, ngimani mo maŋgtooje.

¹³ Ammaa law ɓe ngejjiti kuuɗe maako, ɓe ndeenaay haa o hiɓɓina nufayeeje maako.

¹⁴ Suuno naŋngi ɓe nder ladde. ɓe poondi Allah nder ladde hamaadaare.

¹⁵ O hokki ɓe ko ɓe ƴami nden o ukkani ɓe nyawu kalluŋgu.

¹⁶ Nder saŋngeere ɓe kaaji Muusa e Haruna, cenaaɗo Jawmiraawo.

¹⁷ Lesdi seeki, moɗi Datan, suddi hawtiɗiraaɓe Abiram.

¹⁸ Yiite wuli mooɓre maɓɓe, nyaami halluɓe ɓe'e.

¹⁹ Ɓe mbaɗi suura gaggel haa Horeb, ɓe cujidi yeeso lawru ɓolinaandu ndu'u.

²⁰ Ɓe cannjiri tedduŋgal Allah bee suura nagge meere!

^21-22 Ɓe ngejjiti Allah kisnuɗo ɓe kuuwɗo kuuɗe mawɗe e kaayeefiije haa Misra, lesdi Haamu, non boo kuuɗe kulniiɗe haa maayo Maaliya.

²³ O wi'no o halkan ɓe, to naa Muusa cuɓaaɗo maako darani ɓe, wayliti ɓernuki maako.

²⁴ Nden ɓe njawi lesdi ɓurndi wooɗugo ndi'i, ngam ɓe nuɗɗinaay wolde maako.

²⁵ Ɓe ngurŋgurti nder laymaaji maɓɓe, ɓe cali heɗitaago Jawmiraawo.

²⁶ O ɓaŋgti juŋngo maako, o huni o mbaran ɓe nder ladde,

²⁷ o mbaran danygol maɓɓe caka ummaatooje, o saŋkitan ɓe nder lesɗe jananne.

²⁸ Nden yimɓe maako ɗakkotiri bee Ba'al-Pe'or, ɓe nyaami kirsanaaɗum maayɓe.

²⁹ Ɓe ɓernini Jawmiraawo bee kuuɗe maɓɓe, masiibo ukkani ɓe.

³⁰ Ammaa Pinehas ummi, mo'ini haala, haɗi masiibo man.

³¹ Allah adilini mo haa foroy, diga yidere haa yidere.

³² Ɓe tikkini Jawmiraawo haa ndiyam Meriba, Muusa torrake ngam daliila maɓɓe,

³³ ngam ɓe mettini ɓernde Muusa, haa o yaawi wolwugo ko haanaay.

³⁴ Ɓe nattinaay ummaatooje bana Jawmiraawo umruno ɓe.

³⁵ Ammaa ɓe njillindiri bee maɓɓe, ɓe ekkiti al'aadaaji maɓɓe.

³⁶ Ɓe ndewi labbi, kanjum laatani ɓe tuuforgol.

³⁷ Ɓe kirsani ginnaaji ɓiɓɓe maɓɓe worɓe e rewɓe,

³⁸ ɓe ndufi ƴiiƴam yimɓe ɓe ngalaa aybe, ƴiiƴam ɓiɓɓe maɓɓe worɓe e rewɓe. Ɓe kirsi ɓe ngam labbi Kanaani'en, lesdi soɓi bee ƴiiƴam maɓɓe.

³⁹ Ɓe coɓni ko'e maɓɓe bee kuuɗe maɓɓe, ɓe ɗakkotiri bee labbi, ɓe kuuwi kuuɗe kalluɗe.

⁴⁰ Ngam maajum Jawmiraawo ɓernani yimɓe mum, o wanyi yimɓe laatiiɓe maral maako.

⁴¹ O hokki ɓe haa juuɗe ummaatooje goɗɗe, konne'en maɓɓe laamani ɓe.

⁴² Wanywanyɓe maɓɓe toonyi ɓe, leestini ɓe les baawɗe muuɗum'en.

⁴³ Nde ɗuuɗɗum Jawmiraawo hisni ɓe, ammaa ɓe tokki tuurtango mo, ɓe tullitini waɗugo aybeeji.

⁴⁴ Ammaa bee man fuu Jawmiraawo laari ɓillaare maɓɓe, nani gookaali maɓɓe.

⁴⁵ O siftori alkawal ngal o haɓɓi bee maɓɓe, o faasiti ɓernango ɓe daliila mbooɗeeŋga maako ɗuuɗŋga.

⁴⁶ O wayli numooji dahɓe ɓe fuu, ngam ɓe mo'ana ɓe.

⁴⁷ Hisnu min, yaa Jawmiraawo Allah amin! Wurtin min caka ummaatooje, hooru min, ngam haa min maŋgta innde ma seniinde, min mantoro maŋgtooje ma.

⁴⁸ Yettoore laatano Jawmiraawo mo Allah Isra'iila foroy haa abada. Ummaatoore fuu wi'a: “Aamiina!” Halleluya!