Ibraniŋke'en 7 - Fulfulde Bible

Malkisadaka: Limanjo, laamiiɗo

¹ Malkisadaka oo, o ɗonno laamiiɗo Saliima, o limanjo Allah Ɓaŋiiɗo. Ibrahiima ɗonno warta diga konu haa o mbarino laamiiɓe go. Malkisadaka yehi fotti bee maako, barkiɗini mo.

² Ibrahiima hokki mo zakka, waato yeɓre woore nder sappo haa ko o heɓi fuu. Maana innde maako woni Laamiiɗo-adilaaku. Kadiboo o laamiiɗo Saliima, bana wi'go Laamiiɗo-salaaman.

³ O walaa baaba, o walaa daada, o walaa iwde. Walaa nyalaade danyeeki maako, walaa nyalaade maayde maako. O ɗon bana Ɓiɗɗo Allah, o jooɗoto limanjo haa foroy.

⁴ Ndaare maŋngu Malkisadaka! Ibrahiima, kaaka meeɗen hokki mo zakka haa keɓal konu muuɗum fuu.

⁵ Tawreeta umri ɓiɓɓe Lewi laatiiɓe liman'en, ɓe njaɓa zakka haa ummaatoore, waato haa banndiraaɓe maɓɓe, koo nde kamɓe boo ɓe danygol Ibrahiima.

⁶ Malkisadaka laataaki nder lenyol Lewi, ammaa o jaɓi zakka haa Ibrahiima, o barkiɗini keɓɗo iinaaji Allah oo.

⁷ Walaa seko, barkiɗinɗo ɓuri barkiɗinaaɗo maŋngu.

⁸ Nder limanku Lewi'en, ɗum maayooɓe njaɓata zakka. Ammaa nder limanku Malkisadaka, ɗum goɗɗo mo Deftere seedi o maayataa sam jaɓi zakka.

⁹ Bana wi'go: Lewi jaɓɗo zakka yoɓi ka kaŋko boo nder Ibrahiima.

¹⁰ Ngam saa'i Malkisadaka fotta bee Ibrahiima man, Lewi ɗonno nder ɓanndu baaba maako, o danyaaka tawon.

¹¹ Allah hokki Isra'iila'en tawreeta, darni ka dow limanku Lewi'en. To limanku Lewi'en laatino timmuŋgu, walaano haaje limanjo goɗɗo bana Haruna waŋga, sakkomaa goɗɗo bana Malkisadaka.

¹² Ngam to limanku waylake, doole umroore boo waylo.

¹³ Ngam kuuje ɗe'e mbolwaama dow goɗɗo lenyol feere. Walaa goɗɗo nder maagol meeɗi laataago limanjo haa hirsirde.

¹⁴ Koo moy fuu anndi Jawmiraawo meeɗen danyaama nder lenyol Yahuuda. Muusa meeɗaay wolwugo haala lenyol ngo'ol sam, nde o wolwi haala liman'en.

Limanjo goɗɗo bana Malkisadaka

¹⁵ Haala ka'a ɓesdan laaɓugo fahin to limanjo goɗɗo, nannduɗo bee Malkisadaka waŋgi.

¹⁶ O laataaki limanjo bee umrooje yimɓe, ammaa o laati limanjo bee baawɗe ngeendam ɗam timmataa.

¹⁷ Ngam Deftere seedi dow haala ka'a, wi'i: “A laatoto limanjo haa foroy bana no Malkisadaka wa'no.”

¹⁸ Umroore ɓooymaare wudinaama, ngam nde nafataa.

¹⁹ Ngam tawreeta Muusa waawaay timmidingo koo ɗume. Jonta en keɓi tammunde ɓurnde mawnugo, kayre ɓadinta en bee Allah.

²⁰ Ɗum waɗi bee hunayeere. Liman'en naane ndarnaama bilaa hunayeere bana nde'e.

²¹ Ammaa Yeesu laati limanjo bee hunayeere nde Allah wi'i mo: “Jawmiraawo hunake, mimsitittaako: A laatoto limanjo haa foroy.”

²² Ngam maajum en anndi fakat, Yeesu tabitini alkawal ɓurŋgal ngal naane.

²³ Woodi huunde woɗnde boo: Liman'en naane ɓe ɗuuɗɓe, ngam maayde haɗi ɓe tokkitingo kuuɗe maɓɓe.

²⁴ Ammaa Yeesu ɗon yeeɗi haa foroy, limanku maako duumoto.

²⁵ Ngam maajum o waawan hisnugo yimɓe ɓe o yahri haa Allah jonta e haa foroy, ngam o ɗon yeeɗi haa foroy ngam toranaago ɓe Allah.

²⁶ Yeesu woni hooreejo liman'en mo haandani en. O ceniiɗo, o walaa aybe koo seɗɗa, o laaɓɗo, o senndaama bee hakke'en, o ɓaŋgtaama dow asamanji.

²⁷ O walaa haaje hokkugo kirseteeɗi balɗe fuu bana hoore'en liman'en, aran ngam hakkeeji maako, nden ngam hakkeeji yimɓe. Ammaa o waɗi ɗum nde woore tan bee lii'ugo hoore maako, ɗum he'i haa foroy.

²⁸ Tawreeta Muusa darni tampuɓe ngam ɓe laato hoore'en liman'en. Ammaa koŋngol hunayeere Allah warnde ɓaawo tawreeta darni Ɓiɗɗo mo laati timmididɗo haa foroy.