Ibraniŋke'en 6 - Fulfulde Bible

¹ Ngam maajum njehen yeeso haa ekkitinol mawɓe, taa en tokko jooɗaago haa ekkitinol fuɗɗanɓe nder nuɗɗinki Almasiihu. Taa en puɗɗita wallingo caɓɓawal nuɗɗinki, bana haala tuubugo dow kuuɗe ɗe njahrata en haa maayde e nuɗɗingo Allah

² e ekkitingo baptismaaji e wallingo juuɗe e ummitineeki maayɓe e kiita nduumiika.

³ Ndaa ko en ngiɗi waɗugo, to Allah muuyi.

^4-6 To yimɓe ɓe meeɗi jooɗaago nder annoora Allah, metti dokkal iwŋgal diga asama, njaɓi Ruuhu Ceniiɗo, metti belɗum wolde Allah e baawɗe ɗe zamanuuru waranndu, nden ɓe lori ɓaawo, caɗɗum goɗɗo wartira ɓe haa ɓe tuuba fahin. Ngam kamɓe bee ko'e maɓɓe ɓe ɗon ɓila Ɓiɗɗo Allah haa leggal gaafaaŋgal fahin e ɓe ɗon lasbina mo yeeso yimɓe fuu.

⁷ Lesdi toɓraandi tum ɗon fuɗna haakooji nafooji ngam remooɓe, ndi ɗon heɓa barka Allah.

⁸ Ammaa to ndi ɗon fuɗna gi'e e giŋngille tan, ndi nafataa koo ɗume. Neeɓataa, Allah naalan ndi, yiite wulan ndi.

⁹ Ammaa koo to min ɗon mbolwa bana nii, onon yiɗaaɓe, min anndi fakat on ɗon dow laawol ɓurŋgol wooɗugo, waato dow laawol kisndam.

¹⁰ Ngam Allah o adiliijo, o yejjitittaa kuuɗe mooɗon malla yiide nde on kolli mo bee wallugo nuɗɗinɓe, senaaɓe, jonta boo on ɗon mballa ɓe.

¹¹ Min ngiɗi koo moy mooɗon tokko waɗugo ɗum bee tiinaare bana naane haa timmoode, ngam haa on keɓa ko on tammoto.

¹² Taa on laato mbaateendam'en, ammaa on tokko misaalu aartuɓe on nuɗɗingo bee munyal, heɓɓe ndonŋgu ngu Allah iinani ɓe.

Ko Allah wi'i, waɗan fakat

¹³ Nde Allah waɗani Ibrahiima iinawol, o hunaay bee innde woɗnde ɓurnde nde maako, ngam walaa ɓurɗo mo, o huni bee innde maako.

¹⁴ O wi'i: “Fakat mi barkiɗinte bee barkaaji ɗuuɗɗi, mi ɗuuɗɗinan danygol ma.”

¹⁵ Ibrahiima reeni, munyi ngam maajum o heɓi ko Allah iinani mo.

¹⁶ Yimɓe ɗon kunoro bee huunde ɓurannde ɓe, hunayeere man tabitinan ko ɓe mbi'i, timminan haalaaji caka yimɓe.

¹⁷ Bana non boo Allah yerdi waŋginango ronooɓe fodde iinawol muuɗum bee hollugo ɓe alaama ngoɗka no anniya maako sannjataa, o tabitini ɗum bee hunayeere.

¹⁸ Woodi kuuje ɗiɗi ɗe cannjataako, waɗataako Allah fewa nder maaje: Ɗum iinawol e hunayeere maako. Kanjum ɗum ɗon tiɗɗina en, enen nyukkotooɓe haa Allah, en njogo tammunde tabitnde nde o hokki en.

¹⁹ Tammunde nde'e laatani en bana tiggirgal yoŋki, nde dimmbataako, nde ɗon saalo gaɗa wiirndallo.

²⁰ Yeesu aarti en nastugo ton, o nasti ton ngam meeɗen. O laati hooreejo liman'en haa foroy bana Malkisadaka.