Hose'a 9 - Fulfulde Bible

Seyo jinni, kiita ɓaditake

¹ Hose'a wi'i: “An Isra'iila, taa seya, taa welweltu bana ummaatooje goɗɗe. Ngam a acci Allah maaɗa, a laati debbo daakaareejo. A yiɗi ngeenaari daakaareeku haa laarɗe alkamaari fuu.

² Ngam maajum laarɗe e ɓiɗɗirɗe nyaamnataa yimɓe Isra'iila, inaboojam kesam ɗam ɓe ngiɗno boo heɓataako.

³ Ɓe njooɗataako nder lesdi Jawmiraawo, Efrayim loroto haa Misra, haa Assuura boo ɓe nyaaman nyaamduuji coɓɗi.

⁴ Haa ton ɓe ndufantaa Jawmiraawo dokke inaboojam, kirseteeɗi maɓɓe boo pottantaa mo. Nyaamdu maɓɓe laatoto nyaamdu mayiti, koo moy nyaami ndu, soɓan. Nyaamdu maɓɓe laatoto ngam ko'e maɓɓe tan, walaa ko nastata haykaliiru Jawmiraawo.

⁵ Ɗume mbaɗoton nyalaade fottirde, nyalaade juulde Jawmiraawo?

⁶ Ndaa, ɓe fuu ɓe ndilli ngam lesdi maɓɓe wonnake. Fakat Misra jaɓɓoto ɓe, Memfis boo uwan ɓe. Giŋngille njaɓtan pellel cardi maɓɓe marndi saman, gi'e boo keewan cuuɗi maɓɓe.

⁷ Nyalɗe kiita njottake, saa'i waataago waɗi. Sey Isra'iila annda ɗum! On mbi'i: Annabiijo ellitake, marɗo Ruuhu yinnake ngam aybe mooɗon mawni, konnaagu mooɗon ɗuuɗi.

⁸ Aynoowo Efrayim ɗon wondi bee Allah am, ɓe mballini tuuforli tuufoowo colli dow laabi annabiijo maako fuu, ɓe ɗon toonyo mo koo nder suudu Allah maako.

⁹ Ɓe mbonni masin bana yimɓe Gibiya. Allah siftoran aybeeji maɓɓe, hiitoto hakkeeji maɓɓe.”

¹⁰ Jawmiraawo wi'i: “Mi tawi Isra'iila bana inabooje nder ladde hamaadaare. Mi yi'i kaakiraaɓe mooɗon bana ɓiɓɓe ibbi aartuɗe ɓenndugo. Ammaa nde ɓe njotti haa Ba'al-Pe'or, ɓe lii'i ko'e maɓɓe haa lawru semtiniindu. Bana non ɓe laatori nyidduɓe bana giɗaaɗo maɓɓe man.

¹¹ Tedduŋgal Efrayim fiiran bana sonndu. Walaa danyugo, walaa reeduujo, walaa reedugo!

¹² Koo to ɓe mawnini ɓiɓɓe maɓɓe, mi mbaran ɓe diga ɓe laataaki mawɓe. To mi daayake ɓe, ɓe njaran bone boo.

¹³ Mi ɗonno yi'a Efrayim bana lesdi Tirus, njo'inaandi haa nokkuure wilitaande, ammaa Efrayim ɗon yahra ɓiɓɓe mum haa kirsoowo.”

¹⁴ Hose'a tori: “Yaa Jawmiraawo, to doole a hiito ɓe, nden kam hokku rewɓe maɓɓe deeɗi dimari e enɗi joorɗi!”

¹⁵ Jawmiraawo wi'i: “Halleende maɓɓe fuu waŋgi haa Gilgal. Ton nganymi ɓe. Ngam daliila kuuɗe maɓɓe kalluɗe ndiiwanmi ɓe diga saare am. Mi meetataa yiɗugo ɓe, ngam ardiiɓe maɓɓe fuu ɓe tuurtuɓe.

¹⁶ Efrayim fiyaama, ɗaɗi maako njoori, o heɓataa ɓiɓɓe fahin. Koo to ɓe ndanyi boo, mi mbaran ɓiɓɓe maako marɓe saman.”

¹⁷ Hose'a wi'i: “Allah am wudinan ɓe, ngam ɓe nananaay mo. Ɓe ngiiloto caka ummaatooje.”