Hose'a 7 - Fulfulde Bible

Tuurtol Isra'iila

¹ Jawmiraawo wi'i: “Nde ngiɗmi nyawndugo Isra'iila fuu, aybe Efrayim e kuuɗe Samariya kalluɗe mbaŋgi. Ngam ɓe ɗon pewja. Wuyɓe ɗon nasta cuuɗi, fasooɓe ɗon njaɓta dow laabi.

² Ammaa ɓe numataa mi ɗon siftora halleende maɓɓe fuu! Jonta kuuɗe maɓɓe ɗon taari ɓe, mi ɗon yi'a ɗe.

³ Ɓe ɗon ceyna laamiiɗo bee halleende maɓɓe, ardiiɓe boo bee pewe maɓɓe.

⁴ Ɓe fuu ɓe jeenooɓe, ɓe nanndi bee tamsirdu wulndu jaw ndu tamsoowo acci yiite ɗon wula nder maaru, wakkati o jiiɓi kuroori haa ndi ufo.

⁵ Haa nyalaade juulde laamiiɗo maɓɓe, ardiiɓe nyawi bee nguykinoojam, laamiiɗo naŋngindiri juuɗe bee jancooɓe.

⁶ Wakkati man ɓe fuu ɓe ɗon nufo kalluɗum, ɓerɗe maɓɓe nguli bana tamsirdu. Jemmaare fuu tuurtol maɓɓe waŋgata tawon, ammaa fajiri ngol wulan bana yiite.

⁷ Ɓe fuu ɓe ɗon ngula bana yiite tamsirdu ngam halkugo hiitooɓe maɓɓe. Laamiiɓe maɓɓe ndo'i gooto gooto fuu. Ammaa walaa koo gooto maɓɓe toroto yam ballal.

⁸ Efrayim ɗon jillindira bee ummaatooje goɗɗe. Efrayim laati bana tamseere sa'aande wakeere woore tan, nde waylitaaka.

⁹ Jananɓe nyaami semmbe maako, o anndaa. O waɗi dandanndi, o anndaa.

¹⁰ Mawnitaare Isra'iila ɗon seedo dow hoore mum, ammaa ɓe lortaaki haa Jawmiraawo Allah maɓɓe, ɓe ngaylitaaki haa maako ngam haala man fuu.

¹¹ Efrayim laati bana poola kumiiŋga nga walaa hakkiilo. Ɓe ewni Misra ngam ballal, ɓe njehi haa Assuura boo.

¹² To ɓe ndilli, mi we'itan zubaawol am dow maɓɓe, mi jippina ɓe bana colli asama. Mi hiitoto ɓe bana aartumi reentingo jama'aare maɓɓe.

¹³ Bone laatanto ɓe, ngam ɓe ndoggi yam daayiiɗum. Halkere ukkanto ɓe, ngam ɓe tuurtani yam. Mi soottanno ɓe, ammaa ɓe mbolwi pewe dow am.

¹⁴ Nde ɓe mboyi ɓe waaliiɓe dow daage maɓɓe, ɓe toraaki yam nder ɓerɗe maɓɓe. Ɓe ɗon ƴaro ɓalli maɓɓe ngam ɓe keɓa alkamaari e inaboojam kesam. Ammaa min, ɓe ɗon tuurtanammi.

¹⁵ Min mi ekkitini ɓe, mi semmbiɗini juuɗe maɓɓe. Ammaa kamɓe ɓe ɗon nufo kalluɗum dow am.

¹⁶ Ɓe ɗon ngaylito, ammaa naa heedi am. Ɓe ɗon bana lagaawal bonniiŋgal. Ardiiɓe maɓɓe ndo'orto bee kaafahi, ngam daliila ɗemɗe maɓɓe elewɗe. Ngam daliila man yimɓe lesdi Misra njalata ɓe.”