Hose'a 6 - Fulfulde Bible

Tuubu Isra'iila daraaki dow gooŋga

¹ Hose'a wi'i: “Ngare, en lorto haa Jawmiraawo! Kaŋko o seeki en, o yamɗitinan en boo. O fiyi en, o haɓɓan kuuduuje meeɗen boo.

² Ɓaawo nyalɗe ɗiɗi o yeeɗitinan en, nyannde tataɓre o ummitinan en, haa en ngeeɗita yeeso maako.

³ Annden Jawmiraawo, tiinooɗen anndugo mo. O waŋganan en bana no fajiri weetirta fakat. O waranan en bana iyeende, bana no iyeende ragareere yarnirta lesdi.”

⁴ Jawmiraawo wi'i: “An Efrayim, ɗume mi waɗante? An Yahuuda, ko mbaɗanmi ngam ma? Mbooɗeeŋga mooɗon ɗon nanndi bee ruulde fajiri, bana saawawre fajiri sottannde law.

⁵ Ngam maajum paɗɗanmi ɓe bee habaru annabi'en, mi mbaran ɓe bee bolle hunnduko am. Fakat kiita am waŋgan bana annoora.

⁶ Ngam mbooɗeeŋga ngiɗmi, naa kirseteeɗi. Anndal Allah ngiɗmi, naa guleteeɗi.

⁷ Ammaa kamɓe ɓe ɗowtanaaki alkawal am haa Adama, ɓe zammbi yam ton.

⁸ Gile'at ɗum berniwol halluɓe, keewŋgol batte ƴiiƴam.

⁹ Mooɓre liman'en ɗon waaltano yimɓe bana fasooɓe laawol. Ɓe ɗon mbara haa laawol yahugo Sikem, ɓe ɗon kuuwa kuuɗe kalluɗe masin.

¹⁰ Haa nder Isra'iila ngi'mi kulniiɗum nyidduɗum. Haa ton Efrayim ɗon waɗa daakaareeku, ton Isra'iila soɓi.

¹¹ An Yahuuda, ngam maaɗa boo, codol taaskaama, to mi wartiri joonde yimɓe ummaatoore am bana naane.”