Hose'a 3 - Fulfulde Bible

Hose'a e debbo jeenoowo

¹ Jawmiraawo wi'i yam: “Yah fahin, yiɗ debbo jeenoowo mo waaye feere yiɗi go. Yiɗ mo kal-kal bana Jawmiraawo yiɗiri yimɓe Isra'iila, koo ɓe ngayliti haa ɗowanteeɓe woɗɓe, ɓe ngiɗi tame inabooje joorɗe.”

² Mi yehi, mi sootti mo bee ceede cardi sappo e jowi e sa'iiruuri baakin buhuuje ɗiɗi bee reeta.

³ Mi wi'i mo: “Sey a duura haa am, taa waɗ daakaareeku, taa hawtu bee koo moy. Min boo mi hawtataa bee maaɗa.”

⁴ Ngam Isra'iila'en njooɗoto haa duura bilaa laamiiɗo, bilaa ardiiɗo, bilaa kirseteeɗi, bilaa daŋraŋge labbi, bilaa ɗanciki limanjo, bilaa labbi saare.

⁵ Ɓaawo maajum ɓe tuuban, ɓe ngaylititto haa Jawmiraawo Allah maɓɓe e Daawuda laamiiɗo maɓɓe. Nder nyalɗe ragareeje ɓe ngaran bee diwnugo haa Jawmiraawo e mbooɗeeŋga muuɗum.