Gurtaaki 4 - Fulfulde Bible

Allah waŋgini baawɗe mum haa Muusa

¹ Muusa jaabi Jawmiraawo: “Ammaa Isra'iila'en nuɗɗintaa ko mi wi'ata ɓe, ɓe ɗowtantaako yam. Ɓe mbi'atam: Jawmiraawo waŋganaay ma.”

² Jawmiraawo ƴami mo: “Ɗum ɗume haa juŋngo ma?” Muusa jaabi: “Ɗum sawru.”

³ Jawmiraawo wi'i mo: “Sakkin ndu haa lesdi.” O sakkini ndu, ndu laati mboodi. Muusa doggi ndi.

⁴ Ammaa Jawmiraawo wi'i Muusa: “Fortu juŋngo ma, naŋngu ndi wicco.” Muusa forti juŋngo mum, naŋngi ndi. Fahin mboodi laati sawru nder juŋngo maako.

⁵ Jawmiraawo wi'i: “Waɗ bana nii, ngam haa Isra'iila'en nuɗɗina Jawmiraawo, Allah kaakiraaɓe maɓɓe, Allah Ibrahiima e Allah Isiyaaku e Allah Yaakubu waŋgani ma.”

⁶ Jawmiraawo tokki wolwango mo, o wi'i: “Nastin juŋngo haa jiiba wiɓɓere ma.” Muusa nastini ngo. Ammaa nde o wurtini juŋngo maako, o laari ngo waɗi saɗawre raneere.

⁷ Jawmiraawo wi'i mo: “Lornu juŋngo ma haa jiiba wiɓɓere ma.” O lorni ngo. O wurtini ngo, ngo warti bana naane.

⁸ Jawmiraawo wi'i mo: “Koo to Isra'iila'en nuɗɗinaay ma malla ɓe paalaay kaayeefiwol aranol, ɓe nuɗɗinan daliila kaayeefiwol ɗiɗaɓol.

⁹ To ɓe nuɗɗinaay kaayeefiiji ɗiɗi ɗi'i fuu, ɓe nananaay ma boo, a nyeɗa ndiyam haa maayo Niil, a rufa ɗam dow lesdi. Ndiyam maayo Niil ɗa'am laatoto ƴiiƴam.”

Allah suɓi Haruna laatini mo balloowo Muusa

¹⁰ Muusa wi'i Jawmiraawo: “Useni, Jawmiraawo, mi walaa baawal wolwugo. Mi meeɗaay heɓugo baawal man, koo diga saa'iire nde a ɗonno wolwanammi boo. Mi tedda-hundukoojo.”

¹¹ Jawmiraawo wi'i mo: “Moy tagani ɓii-Aadama hunnduko? Moy muukɗinta malla fahɗinta malla yi'nata malla wumnata? Naa min Jawmiraawo na?

¹² Yah! Mi hokkete baawal wolwugo, mi anndinte ko a tammi wolwugo.”

¹³ Muusa wi'i: “Useni yaa Jawmiraawo, nel goɗɗo feere!”

¹⁴ Nden Jawmiraawo tikkani Muusa, o wi'i mo: “Naa a ɗon bee Haruna deerɗiraawo ma Lewiijo na? Mi anndi kaŋko o waawi wolwugo booɗɗum. Ndaa, o ɗon wara haa o fotta bee ma. To o yi'i ma, ɓernde maako seyoto.

¹⁵ A wolwanan mo, a anndinan mo ko haani o wolwa. Mi hokkan on ɗiɗo fuu baawal wolwugo e mi anndinan on ko mbaɗoton.

¹⁶ Kaŋko o wolwanan ummaatoore mbattudi ma, o laatoto bolwoowo bolle ma. An boo a laatanto mo loŋnginoowo bolle.

¹⁷ Sawru ndu'u boo, koo'a ndu haa juŋngo ma. Bee maaru mbaɗata kaayeefiiji.”

Muusa lori haa ummaatoore muuɗum haa Misra

¹⁸ Muusa lori haa esum Yetiro, wi'i mo: “Useni accam mi lorto haa deerɗiraaɓe am haa Misra, haa mi laara to ɓe yeeɗɓe.” Yetiro wi'i Muusa: “Yah jam!”

¹⁹ Nden Jawmiraawo wi'i Muusa nder lesdi Mediyan: “Lora haa Misra, ngam yiɗnooɓe mbarugo ma fuu maayi.”

²⁰ Muusa hoo'i debbo mum e ɓikkoy mum, wa'ini ɓe dow wamnde. Nden o lori haa Misra, o ɗon jogi sawru ndu Allah wi'no mo o jogo.

²¹ Fahin Jawmiraawo wi'i Muusa: “Mi hokki ma baawɗe waɗugo kaayeefiiji koo ɗiye fuu. To a lortake haa Misra, tiina waɗugo kaayeefiiji ɗi'i yeeso Firawna. Min, mi saatinan hoore maako ngam taa o yoofta Isra'iila'en.

²² Nden mbi'a Firawna: Ndaa ko Jawmiraawo wi'i: Ummaatoore Isra'iila woni ɓiɗɗo am afo.

²³ Mi umrino ma a acca nde dilla, nde jaggano yam, ammaa a sali. Ngam maajum mi mbaran afo ma!”

²⁴ Dow laawol, nder jipporde, Jawmiraawo fotti bee Muusa, ɗaɓɓi mbarugo mo.

²⁵ Cifuura hoo'i hayre seeɓnde, ta'i laral saadooniiku ɓiyum. O meemi les Muusa bee maagal, o wi'i: “A laatani yam ɓaŋɗo ƴiiƴam.”

²⁶ Nden Jawmiraawo acci Muusa. Cifuura wi'i ɓaŋɗo ƴiiƴam ngam daliila juulnol.

²⁷ Jawmiraawo wi'i Haruna: “Yah haa ladde, potta bee Muusa.” Haruna yehi, fottoyi bee deerɗiraawo mum haa hooseere Allah, hebbi ɗum.

²⁸ Muusa yecci Haruna bolle Jawmiraawo nelɗo mo fuu, o anndini mo boo haala kaayeefiiji ɗi Jawmiraawo umri mo waɗugo fuu.

²⁹ Ɓaawo man Muusa e Haruna njehi, ɓe mooɓti ndotti'en Isra'iila fuu.

³⁰ Haruna lorni wolde nde Jawmiraawo wi'no Muusa fuu. Muusa boo waɗi kaayeefiiji go yeeso Isra'iila'en.

³¹ Yimɓe nuɗɗini. Ɓe nani Jawmiraawo hakkilani Isra'iila'en, o laari toskaare maɓɓe. Nden ɓe turi, ɓe cujidani mo.